Дзяржава адмовілася фінансаваць экспазіцыю ў Гальшанскім замку і параіла прыцягваць пазабюджэтныя сродкі
Праекціроўшчык і рэстаўратар Ігар Раханскі, які раней кіраваў стварэннем праекта кансервацыі з элементамі рэканструкцыі паўночна-ўсходняга і паўночна-заходняга карпусоў Гальшанскага замка, атрымаў ліст з Міністэрства культуры адносна стварэння на руінах замка музейнай экспазіцыі. Ствараць яе, як лічаць у ведамстве, «мэтазгодна за кошт пазабюджэтных сродкаў», на падтрымку з бюджэту разлічваць не выпадае.
13.04.2023 / 22:35
Фота дакумента, атрыманага з Міністэрства культуры і падпісанага намеснікам міністра Сяргеем Саракачам, Раханскі размясціў у сябе на старонцы.
«Работы, якія выконваюцца за кошт бюджэтных сродкаў у рамках аб’екта «Кансервацыя з фрагментарнай рэстаўрацыяй і выкарыстаннем руін былога замка Сапегі з фрагментамі абарончых збудаванняў у аг. Гальшаны Ашмянскага раёна»,
у першую чаргу павінны быць накіраваныя на забеспячэнне захаванасці гісторыка-культурнай каштоўнасці і прадухіленне яе далейшага разбурэння. З улікам выкладзенага лічым мэтазгодным працы па стварэнні музейнай экспазіцыі ў паўночна-ўсходнім корпусе выконваць за кошт пазабюджэтных сродкаў», — сказана ў лісце.
«Сістэма нормаў настроена так, што музейная экспазіцыя ў карпусах замка не праходзіць узгадненні і экспертызу», — пракаментаваў Раханскі гэты ліст на сваёй старонцы.
Чытайце таксама:
У Ружанах аднаўляюць капліцу святога Казіміра
Як выглядае сядзіба Тадэвуша Рэйтана ў Грушаўцы, дзе праходзіць рэканструкцыя
На Шчучыншчыне пачалася рэстаўрацыя Маламажэйкаўскай царквы ў Мураванцы