У Белавежскай пушчы падлічылі ўсіх зуброў
У Белавежскай пушчы скончылі зімовы ўлік зуброў: на пачатак года колькасць статка склала 730 асобін — на 27 больш, чым летась. Такая інфармацыя апублікаваная на афіцыйным сайце Нацыянальнага парку.
05.04.2023 / 10:04
Працаёмкія работы вяліся ў студзені-сакавіку з дапамогай аптычных сродкаў назіранняў і метадам фатаграфавання з квадракоптара. Вынікі сведчаць, што тэндэнцыя штогадовага павелічэння колькасці зуброў у Белавежскай пушчы захоўваецца.
На працягу 2022 года тут нарадзіліся 103 цяля. Большую частку зубрынага статка (51,2%) складаюць дарослыя самкі ва ўзросце старэйшыя за 3,5 года — іх налічылі 374. Пятую частку (21%) — маладняк ад паўтары да 3,5 года. Дарослых самцоў старэйшых ўлічана 100 асобін (13,7%).
Папуляцыя па-ранейшаму размеркавана па пяці асноўных тэрытарыяльных групоўках. Самы шматлікі статак знаходзіцца ў паўднёвай частцы пушчы (Сухапольскае, Шарашэўскае, Ясеньскае, Пашукоўскае, Каралева-Мастоўскае лясніцтвы) — там пражываюць 323 зубры. Паўднёва-заходнюю групоўку (Бялянскае, Дзмітравіцкае лясніцтваы) утвараюць 134 жывёл. Паўночна-ўсходнюю (Навадворскае, Поразаўскае лясніцтвы) — 142 асобіны. Менш за ўсё зуброў налічваецца ў цэнтральнай (Хвойніцкае лясніцтва) і Паўночнай (Свіслацкае лясніцтва) часткі пушчы — 67 і 56 асобін адпаведна.
Акрамя таго, 8 зуброў ўтрымліваюцца ў экскурсійных вальерах.
У польскай частцы Белавежскай пушчы на пачатак 2023 года налічвалася 829 зуброў, у тым ліку 138 цялят.