Тэлеграм-бот «Магніт», які сілавікі ставяць затрыманым: якія звесткі ён можа збіраць і як ад гэтага абараніцца
Падчас аблавы ў Дзяржынску затрыманым запускалі ў тэлеграме новы бот «Магніт», які стварылі сілавікі. Распавядаем, чым ён можа быць небяспечны і што рабіць, каб ад яго абарніцца.
03.04.2023 / 22:39
Што за бот «Магніт» і якія звесткі Telegram-акаўнта ён можа збіраць?
Гэты бот у тэлеграме міліцыянты апошнім часам запускаюць многім затрыманым. Ініцыятывы CyberBeaver лічыць, што гэта можа быць саманапісаны бот, задача якога — сабраць інфармацыю з акаўнта.
«Мы мяркуем, што ён можа збіраць усе падпіскі, выдаваць id і нумар тэлефона, кантакты, можа сапраўды далучацца да нейкай базы і праганяць па ёй. Таксама можа залезці ў раней сабраны архіў акаўнта і выдаць суполкі, на якія чалавек быў раней падпісаны, але цяпер адпісаўся. Але там можа быць і шмат іншых функцыяў», — мяркуюць у ініцыятыве.
«Канешне, частку з гэтых даных можна знайсці іншымі сродкамі, але калі такі бот тэарэтычна збірае ўсе звесткі ў адну базу, то пераслед людзей становіцца прасцейшым», — дадаюць у CyberBeaver.
Падобнай пазіцыі наконт бота «Магніт» прытрымліваецца і аб'яднанне былых сілавікоў «Байпол», а таксама Кіберпартызаны.
Як падрытхавацца да таго, што на вашым акаўнце запусцяць «Магніт»?
Дакладна так жа, як і да любога ператрусу — мець акаўнт «чыстым». Калі на вашым акаўнце ўжо ёсць след з суполак ці вы разумееце, што пры аналізе ботам «Магніт» вам пагражае пераслед, то варта акаўнт выдаліць і стварыць нанова. Гэта не гарантыя бяспекі, але нашмат лепш, чым не рабіць гэтага.
«Кіберпартызаны» раяць таксама стварыць асобны акаўнт для палітычных чатаў і каналаў. Пасля гэтага — загрузіць «Партызанскі тэлеграм» і наладзіць ілжывы код-пароль, пры ўводзе якога гэты акаўнт будзе аўтаматычна хавацца або праграма будзе выходзіць з яго. Пры ператрусе тады можна ўвесці фальшывы код-пароль і паказаць «чысты» акаўнт, з якога вы не падпісаныя на палітычныя чаты і каналы.
Відэа-інструкцыя па настройках «Партызанскага тэлеграма» ёсць тут.
Што рабіць, калі на вашым акаўнце ўжо запускалі бот «Магніт»?
«Кіберпартызаны» раяць, па-першае, ніколі больш на падпісвацца з гэтага акаўнта на палітычныя каналы або чаты.
Па-другое, як мага хутчэй акаўнт выдаліць.
Па-трэцяе, калі вы разумееце, што пасля запуску бота «Магніт» і атрымання звестак пра ваш акаўнт вам пагражае крымінальная справа, то падумаць, наколькі небяспечна заставацца ў краіне.
Чытайце таксама:
Kotatogram: губазікаўцы паказалі, як яны аналізуюць пратэсныя чаты. Вось што варта ведаць
Затрымалі былога мадэратара сеткі «Кіроўцы 97%», на якога не маглі выйсці два гады. Распавядаем, чаго ён не ўлічыў
Тлумачым, якім чынам сілавікі знаходзяць карыстальнікаў Telegram і як гэтага пазбегнуць