Abmiežavańni dla biełarusaŭ i rasijan u Litvie płanujuć pakinuć u sile, ale nie ŭsie
29 sakavika parłamiencki Kamitet pa nacbiaśpiecy i abaronie Litvy ŭchvaliŭ źmiakčeńnie abmiežavańniaŭ dla rasijan i biełarusaŭ, praduhledžana bolš vyklučeńniaŭ. U čacvier pa pradstaŭlenych zakonach parłamient budzie hałasavać apošni raz, piša Delfi.lt.
29.03.2023 / 14:56
Prajekt zakonaŭ byŭ uchvaleny parłamientam u pieršym čytańni. Deputaty ŭchvalili abmiežavańnie pravoŭ rasijan i biełarusaŭ na ŭvoz i vyvaz z terytoryi Litvy najaŭnych hrošaj, zabaronu ŭvozu ŭkrainskich hryŭniaŭ. Deputaty taksama padtrymali prapanovu frakcyi Partyi svabody dazvolić bolš šyrokamu kołu hramadzian Rasii kuplać nieruchomaść u Litvie (tym, u kaho jość časovy abo pastajanny dazvoł na žycharstva ŭ Litvie) i prymać nieruchomaść u spadčynu.
Členy kamiteta taksama padtrymali prapanovu Jonasa Jarucisa adterminavać ustupleńnie ŭ siłu abmiežavańnia na vydaču časovaha dazvołu na žycharstva biełarusam da 1 lipienia 2023 hoda.
«Heta źviazana ź biznesam. U Litvie bolš za 50% kiroŭcaŭ-dalnabojščykaŭ — hramadzianie Biełarusi. Niekatoryja, ich bolš za tysiaču, stajać u čarzie na kursy, jakija dazvalajuć pracavać u JES i ŭ Litvie kiroŭcami. Heta było b surjoznaj prablemaj i ciažaram dla litoŭskaha transpartnaha siektara, jakomu i biez taho nie chapaje kiroŭcaŭ», — skazaŭ Jarucis.
Bolš dyskusij vyklikała pytańnie prypynieńnia pryjomu zajavak na atrymańnie litoŭskaha hramadzianstva.
Niahledziačy na zaŭvahi, členy kamiteta ŭchvalili prapanovu kiraŭnika kamiteta Łaŭrynasa Kaščunasa pakinuć hetaje abmiežavańnie ŭ sile.
Praŭda, budzie bolš vyklučeńniaŭ: kali čałaviek adkazvaje patrabavańniam zakona ab naturalizacyi i jość infarmacyja, što jon nie ŭjaŭlaje pahrozy dla nacbiaśpieki i hramadskaha paradku; kali ŭ čałavieka jość prava na adnaŭleńnie hramadzianstva ŭ adpaviednaści ź dziejnymi zakonami i jość infarmacyja, što jon nie ŭjaŭlaje pahrozy dla nacbiaśpieki i hramadskaha paradku; padajecca zajaŭka ab admovie ad hramadzianstva Litvy abo rašeńnie ab pazbaŭleńni hramadzianstva prymajecca, kali čałaviek atrymaŭ hramadzianstva inšaj krainy. Libierały prapanoŭvali nie abmiažoŭvać pryjom zajavak na hramadzianstva ad biełarusaŭ i rasijan, ale hetaja prapanova była adchilena.
Čytajcie taksama:
Daradca prezidenta Litvy pra abmiežavańni dla biełarusaŭ: Padčas vajny heta nieabchodna
Ofis Cichanoŭskaj prakamientavaŭ novy zakon, jaki mohuć pryniać pa biełarusach u Litvie
U Litvie chočuć prypynić pryjom zajaŭ na hramadzianstva ad biełarusaŭ i rasijan