Na Mahiloŭščynie razvoddzie adrezała častku adnaho z rajonaŭ ad «vialikaj ziamli». Zatoplena pieraprava cieraz Sož
Pavodka na Sožy spyniła ruch pa pantonnaj pierapravie, jakaja źviazvała Čerykaŭ z susiednimi rajcentrami Kaściukovičy i Krasnapolle. Zaraz, kab dabracca adtul da Mahilova dy i da Čerykava, treba rabić kruh lišniuju sotniu kiłamietraŭ.
29.03.2023 / 10:21
Fota: telehram-kanał «Čerykaŭ online»
«Raka Sož z-za pavodki i zaciažnych daždžoŭ vyjšła ź bierahoŭ i zatapiła pojmu. Pa hetaj pryčynie ŭ najbližejšy čas niemahčyma vykarystańnie pantonnaha mosta i nasypnoj darohi. Apošniaja poŭnaściu pajšła pad vadu», — paviedamlajecca ŭ telehram-kanale čerykaŭskaj rajonki.
U rajvykankamie nie stali havaryć pra situacyju ź pierapravaju na druhi bierah Soža. U pryvatnaj hutarcy adzin z čynoŭnikaŭ zapeŭniŭ, što pytańnie budzie ŭźniata na najbližejšaj płaniorcy ŭ staršyni i vyjście budzie znojdziena.
Tym časam u sacyjalnych sietkach pišuć, što panton Krasnapolle — Čerykaŭ začynieny na nieakreśleny termin.
«A što možna zrabić? Chiba tolki treba čakać, kali spadzie vada», — adreahavaŭ na pytańnie pra situacyju čerykaŭski aŭtamabilist.
Pantonnaja pieraprava cieraz Sož. Fota: «Vieśnik Čerykaŭščyny»
Adrezanaj ad «vialikaj ziamli» akazałasia i častka Čerykaŭskaha rajona. Heta pieravažna zabrudžanyja radyjacyjaj miaściny, dzie žyvie blizu 700 čałaviek. Najbujniejšy tamtejšy pasiołak Majski pabudavali paśla avaryi na Čarnobylskaj AES. Jaho zasiali try dziasiatki hadoŭ tamu pierasialencami z adsielenych z-za radyjacyi viosak.
Čerykaŭski most cieraz Sož ličycca na Mahiloŭščynie najvialikšym. Jon byŭ daviedzieny da avaryjnaha stanu i jaho ŭzialisia ekstranna ramantavać letaś u kastryčniku.
Pantonnuju pierapravu navodzili sałdaty inžyniernych vojsk. Fota: «Vieśnik Čerykaŭščyny»
U žycharoŭ Čerykava sioleta ŭžo byli kłopaty ź pierapravaj, kali daždžami razmyvała darohu da pantona. Ludzi narakali, što im ciažka było dabracca da samoj pierapravy. Prablemie rady dać nie paśpieli, a ciapier pantonny most pad vadoju.
Pa moście da ramontu prajazdžała za dzień kala 1300 mašyn: vielikahruzny transpart, technika lashasaŭ i ahrapradpryjemstvaŭ, a taksama pasažyrski i lehkavy transpart. Most byŭ uźviedzieny ŭ 1962 hodzie.
Čytajcie taksama:
Minskija Sierabranku i Čyžoŭku złučyli piešachodnym mostam
Parom praz Mora Hieradota. Ad Łuninca da Pietrykava: repartaž ź niejmaviernaha Palessia
U Turavie ludziej praz rečku pierapraŭlajuć u kaŭšy pahruzčyka FOTAFAKT