У Германіі ля стаянкі знойдзены труп мужчыны — магчыма, беларуса
У раёне стаянкі для велікагрузаў ля нямецкай камуны Гуксхаген, зямля Гесэн, знайшлі труп мужчыны — як мяркуецца, беларуса. Пра гэта паведамляе belmir.by cа спасылкай на мясцовую паліцыю.
28.03.2023 / 09:47
Фота ілюстрацыйнае. Фота нямецкай паліцыі
Цела было знойдзена раніцай у панядзелак 27 сакавіка на адхоне побач з паркоўкай для дальнабойшчыкаў «Квілервальд» на трасе ВАВ 7 у напрамку руху на поўнач.
У гэтым раёне вёўся інтэнсіўны пошук у сувязі са знікненнем 32-гадовага кіроўцы фуры з Беларусі. Яго грузавік некалькімі днямі раней знайшлі на паркоўцы. Выяўленае цела адпавядае апісанню зніклага.
Аднак дакладна асоба і прычыны гібелі чалавека яшчэ не ўстаноўлены. Будзе праведзена судова-медыцынская экспертыза.
У цяперашні час праваахоўнікі горада Хомберг вядуць расследаванне. Прыкмет гвалтоўнай смерці на дадзены момант няма.