Startuje kampanija padtrymki palitviaźniaŭ «Pakul usie nie buduć volnyja»
«25 sakavika na dzień Voli my zapuskajem kampaniju «Pakul usie nie buduć volnyja», dzie viadomyja biełarusy i biełaruski buduć padtrymlivać našych palityčnych źniavolenych nie tolki infarmacyjna, ale i napramuju», — paviedamili inicytyva Dissident.by i fond «Kraina dla žyćcia».
23.03.2023 / 21:53
«Na siońniašni dzień, kali śviet sprabuje spravicca z uśviedamleńniem vajny ŭ Jeŭropie, a taksama jašče nie ŭśviadomiŭ da kanca trahiedyju ziemlatrusu ŭ Turcyi, ludzi častkova zabylisia na palitviaźniaŭ u našaj krainie. Na vialiki žal, praces baraćby z dyktaturaj Biełarusi nie atrymaŭsia chutkim. Zamiest čakanaha paśla padziej 20-ha hoda spryntu my atrymali doŭhi kros, ź vialikaj kolkaściu pieraškod i padvodnych kamianioŭ», — kanstatujuć arhanizatary kampanii.
«Na hetym praciahłym šlachu my, nieabyjakavyja i salidarnyja, — adzinyja, chto moža być hołasam izalavanych ad hramadstva ludziej», — zajaŭlajuć jany.
«Efiektyŭnaja padtrymka čałavieka ŭ źniavoleńni nie moža być razavaj.
Tolki rehularnaje ŭklučeńnie palityčnych aktaraŭ, apazicyjnych lidaraŭ, suśvietnaj supolnaści i dyjaspar, a taksama žycharoŭ/ak krainy moža harantavać zachavańnie fizičnaha i psichałahičnaha zdaroŭja dysidentaŭ i ich blizkich».
Akramia taho, ludzi ŭnutry krainy časta zapałochanyja i nie hatovyja havaryć pra svaich blizkich z-za strachu pieraśledu. Tym hučniej pavinien być hołas tych, chto takuju mahčymaść maje, znachodziačysia pa-za dasiažnaściu kryvavych łap dyktatury», — śćviardžajuć aktyvisty.
Zhetul vynikaje:
«Najbolš čuvać u sučasnym śviecie hałasy viadomych biełarusaŭ i biełarusak: pradstaŭnikoŭ/ic pravaabarončaj supolnaści, hramadzianskich aktyvistaŭ/ak, apazicyjnych lidaraŭ/ak i žurnalistaŭ/ak.
Mienavita jany mahli b uziać apiekavańnie nad tym ci inšym viaźniam/viazynkaj režyma Łukašenki, kab abaraniać intaresy źniavolenaha/aj na roznych miedyja-placoŭkach, u SMI, ahučvać prablemy nie razmytych «tysiač palitviaźniaŭ», ale ciažar kankretnaha čałavieka i jaho siamji».