З Беларусі сыходзяць яшчэ дзве вядомыя IT-кампаніі
ІТ-кампаніі Gurtam і Akveo закрываюць беларускія юрыдычныя асобы. Такая інфармацыя з'явілася на сайце адзінага дзяржрэгістратара, паведамляе Dev.by. Рашэнне аб ліквідацыі прынялі ўласнікі кампаній.
22.03.2023 / 20:39
Gurtam афіцыйна ліквідуе кампанію ў Беларусі з 28 лютага, Akveo — з 9 студзеня.
Паводле інфармацыі dev.by, яшчэ ў канцы мінулага года супрацоўнікам Akveo прапанавалі альбо рэлакавацца, альбо звольніцца
Беларуская ІТ-кампанія Gurtam заснаваная ў 2002 годзе Аляксеем і Уладзімірам Шчурко. Кампанія стварыла платформу для спадарожнікавага маніторынгу і інтэрнэту рэчаў Wialon, а таксама платформу flespi для паскоранай распрацоўкі геалакацыйных рашэнняў. Да Wialon падключана больш за 3,5 мільёнаў машын і іншых аб'ектаў у больш чым 150 краінах свету.
Софт Gurtam выкарыстоўваюць сотні тысяч кампаній па ўсім свеце: ад сэрвісаў па дастаўцы піцы і таксапаркаў да нафтавых карпарацый і дзяржаўных службаў. Офісы кампаніі адкрытыя ў 5 краінах: Літва, Грузія, ААЭ, Аргенціна, ЗША.
У Gurtam працуе каля 300 спецыялістаў. Раней асноўная каманда працавала ў Беларусі, цяпер большасць — у Літве. Некторыя з кіраўніцтва кампаніі падчас пратэстаў 2020 года патраплялі пад рэпрэсіі.
У лютым 2022 года пасля пачатку вайны ва Украіне Gurtam дала украінскім кампаніям бясплатны доступ да хмарных сэрвісаў на больш чым 6 месяцаў. У сакавіку кампанія прыпыніла продажы сваіх прадуктаў у Расіі, а ў снежні ліквідавала расійскую юрыдычную асобу.
Кампанія Akveo ўтворана ў 2015 годзе, як заснавальнікі — Канстанцін Даноўскі і Уладзімір Лугаўскі. Akveo займаецца распрацоўкай уласных праграмных прадуктаў для вэб і мабільных рашэнняў (ngx-admin, Kitten Tricks і іншыя). Прадукты прымяняюцца ў аўтамабільнай, турыстычнай, банкаўскай, медыцынскай, тэлекамунікацыйнай і адукацыйнай галінах.
Офісы кампаніі адкрыты ў Дэнверы і Вільні, увосень мінулага года Akveo зарэгістравала юрыдычную асобу ў Варшаве. У кампаніі працуе каля 100 спецыялістаў, раней у асноўным яны былі ў Мінску, цяпер — у Літве і Польшчы.
Таксама, па звестках адзінага дзяржрэгістру, цяпер ліквідуюцца яшчэ некалькі ІТ-кампаній: «ПЦІ Салюшнс», «Дата Фрэшлі» і «Інэвэйт Юроп».
Раней з беларускага рынку сышлі буйныя прадуктовыя кампаніі Wargaming, One Soil, Flo, Targetprocess, Fibery, Vochi, Wannaby, Playgendary, Verv. Пакуль застаюцца працаваць у Беларусі SayGames, Belka Games, Gismart, Easybrain.
Чытайце таксама: