Polskija pieravozčyki pačali strajk, ale padtrymali jaho nie ŭsie
Polskija pieravozčyki pačali strajk, arhanizavany transpartnymi kampanijami Lublinskaha vajavodstva i palitykami pravaj partyi «Kanfiederacyja». Zabastoŭka pačałasia z pres-kanfierencyi, a zatym hruzavyja aŭtamabili nakiravalisia da Varšavy, paviedamlaje Most.
22.03.2023 / 18:15
Fota: Twitter / Konfederacja
Hruzaviki pakul nie zajazdžali ŭ polskuju stalicu, a prosta abjechali jaje pa akružnoj darozie.
U arhanizataraŭ strajku čatyry patrabavańni:
- błakavańnie ŭjezdu rasijskich i biełaruskich paŭpryčepaŭ u Polšču;
- zabarona na rehistracyju ŭ Polščy kampanij ź biełaruskim i rasijskim kapitałam;
- uviadzieńnie adkaznaści hruzaadpraŭščyka za apłatu pasłuh transpartnaj kampanii;
- adnaŭleńnie dazvołaŭ dla ŭkrainskich pieravozčykaŭ na dvuchbakovyja pieravozki.
Svaje patrabavańni pratestoŭcy pieradaduć uradu i daduć 14 dzion na ich vykanańnie.
U toj ža čas zabastoŭku pieravozčykaŭ, arhanizavanuju kaalicyjaj kansiervatyŭnych palityčnych partyj, uchvalajuć nie ŭsie pradstaŭniki transpartnaj haliny Polščy. Prezident Asacyjacyi TLP Maciej Vronski zajaviŭ, što akcyja, jakuju arhanizavali transpartniki z uschodniaj Polščy, nie zasłuhoŭvaje prasoŭvańnia ŭ publičnym poli.
Vronski kaža, što nie razumieje idei zabaranić abo pieraškodzić biełarusam adkryvać biznes u Polščy.
«Padčas apošnich falsifikavanych prezidenckich vybaraŭ jany pakazali, što, jak nacyja, jany na baku demakratyi. Viadoma, jany pavinny dziejničać u adpaviednaści z polskim zakonam, jak i polskija pieravozčyki. I tut źjaŭlajecca rola polskich kantrolnych słužbaŭ, jakija pavinny sačyć za tym, kab zakon vykonvaŭsia jak u kampanijach z polskim, tak i ź biełaruskim kapitałam», — zajaviŭ jon.
Čytajcie taksama:
Litoŭskija aŭtapieravozčyki prosiać pavialičyć kolkaść mytnikaŭ na miažy ź Biełarussiu