Dzie ciapier viadomy spartovy kamientatar Navicki
Hołas Uładzimira Navickaha viedaje kožny biełarus, jaki bolš-mienš sačyŭ za sportam u apošnija hadoŭ 30. Čym ciapier zajmajecca samy słavuty z kamientataraŭ na biełaruskim spartovym telebačańni?
20.03.2023 / 18:59
Uładzimir Navicki. Fota: sb.by
Uładzimir Navicki trapiŭ u spartovuju žurnalistyku jašče ŭ kancy 70-ch i zastavaŭsia ŭ prafiesii 38 hadoŭ. Za hety čas charyzmatyčny Navicki, inžynier pa adukacyi, papracavaŭ na trynaccaci Alimpijadach, čempijanatach śvietu pa futbole i chakieju i bieźličy inšych vialikich turniraŭ.
Dziela prafiesii Navicki za niekalki miesiacaŭ vyvučyŭ biełaruskuju movu i kamientavaŭ sport u tym liku pa-biełarusku. Ale ŭ toj ža čas jaho, naprykład, adnojčy abvinavacili ŭ danośnictvie.
Bližej da kanca 2010-ch za Metram, jak nazyvali hetaha kamientatara, stali zaŭvažać ahavorki. Naprykład, jon moh raspavieści hledačam pra chakieistaŭ, jakija čamuści vychodziać na futbolnaje pole, ci pra futbalista, jaki nibyta hulaje ŭ matčy, chacia nasamreč jon spakojna siadzieŭ na łavie zapasnych. Tym nie mienš, da Navickaha i jaho pracy stavilisia z pavahaj.
U 2019-m 65-hadovy kamientatar pajšoŭ na piensiju. Čym jon zajmaŭsia paśla?
Jak stała viadoma «Našaj Nivie», Navicki doŭha zmahaŭsia ź ciažkaj chvarobaj. Dalej znakamity kamientatar sprabavaŭ viarnucca na «Biełaruś 5», ale nie zmoh damovicca pra heta z kiraŭnictvam kanała.
Adnak i ŭ takoj situacyi kamientatar nie zastaŭsia biez pracy. Navicki maje daŭniuju luboŭ da biełaruskaha plažnaha futboła, i ciapier, na piensii, jon praciahnuŭ kamientavać plažnafutbolnyja hulni na žyva. A 17 sakavika Navicki i ŭvohule paradniŭsia z fiederacyjaj plažnaha futboła — zorku spartovaha telebačańnia vybrali adnym z členaŭ vykankama hetaha abjadnańnia.
25 cytat, pierłaŭ i afaryzmaŭ ad Uładzimira Navickaha