У Гродне губазікаўцы затрымалі і збілі рабочага
Сляды збіцця бачны на відэа, якое выклалі сілавікі.
17.03.2023 / 20:27
Затрыманы гарадзенец Сцяпан Задойка. Фота: яго старонка «УКантакце»
Затрыманы — 38-гадовы гродзенец Сцяпан Задойка. Ён працуе рабочым на адным з прыватных прадпрыемстваў Гродна. Таксама мужчына рэгулярна ходзіць у зал і падтрымлівае сябе ў добрай фізічнай форме, калі меркаваць па фота ў сацсетках.
На відэа на каналах сілавікоў на яго накідваецца пяцёра байцоў САХР, а пазней мужчына выглядае збітым: у яго моцна падбіта вока і падрапаная да крыві галава (верагодна, таму большую частку відэа ён стаіць адным бокам да камеры і толькі адзін раз паварочваецца цалкам).
Сляды катаванняў на твары гарадзенца бачныя, нягледзячы на дрэнную якасць відэа. Скрын відэа тэлеграм-канала ГУБАЗіКа
ГУБАЗіК сцвярджае, што Сцяпан Задойка напісаў больш за тысячу каментароў у інтэрнэце. Адметна, што паказаныя сілавікамі каментары напісаныя ў асноўным на беларускай мове і ў асноўным накіраваныя на падтрымку Украіны.
Усе паказаныя каментары — з ютуба.
Чытайце таксама:
За каментары затрымалі айцішніка, які выдаліў тэлеграм-акаўнт паўтара года таму. Вось як яго знайшлі
Я выдаліў Telegram-акаўнт. Я ў бяспецы?
ГУБАЗіК расказаў пра жанчыну, якая «прыйшла пакаяцца». Пасля яе адправілі ў калонію і ўнеслі ў «спіс тэрарыстаў»