Польскія ўлады расказалі, у чым абвінавачваюць расійскую шпіёнскую сетку, дзе таксама фігуруюць беларусы
Кіраўнік МУС Польшчы заявіў, што ўсяго былі арыштаваны 9 чалавек.
16.03.2023 / 15:40
Міністр ўнутранных спраў Польшчы Марыюш Камінскі, Фота: МУС Польшчы
Міністэрства ўнутраных спраў Польшчы раскрыла новыя падрабязнасці аб нядаўнім выяўленні расійскай шпіёнскай сеткі ў краіне. Інфармацыя пра гэта была апублікавана 16 сакавіка на афіцыйным сайце ведамства.
Кіраўнік польскага МУС Марыюш Камінскі заявіў, што ў усяго было затрымана 9 «замежнікаў з усходніх межаў», якія вялі выведвальную дзейнасць і рыхтавалі дыверсіі ў Польшчы.
«Затрыманыя — замежнікі з-за ўсходняй мяжы. Шэсць з іх былі змешчаныя пад варту да суда. Пракуратура прад'явіла ім абвінавачанне ў шпіянажы на карысць Расіі і ўдзеле ў арганізаванай злачыннай групе. У дачыненні да яшчэ траіх, затрыманых учора, працягваюць весціся следчыя мерапрыемствы», — распавёў Камінскі.
Паводле яго слоў, галоўнай мэтай шпіёнаў быў сабатаж ваеннай дапамогі Украіне, а таксама прапаганда антызаходніх настрояў у Польшы.
Таксама па інфармацыі польскага Агенцтва ўнутранай бяспекі, затрыманыя за сваю дзейнасць рэгулярна атрымлівалі ўзнагароду ад расійскіх спецслужбаў.
Нагадаем, што яшчэ ўчора з'явілася інфармацыя аб ліквідацыі расійскай шпіёнскай сеткі ў Польшчы. Тады паведамлялася, што дыверсанты займаліся сачэннем за чыгуначнымі пуцямі ў Падкарпацкім ваяводстве — у прыватнасці, каля аэрапорта Ясёнцзы непадалёк ад Жэшува, дзе размешчаны важны пункт паставак заходняй зброі ва Украіну.
У польскіх СМІ і ведамствах афіцыйна яшчэ не з'яўлялася інфармацыя аб асобах затрыманых, бо гэта забаронена польскімі законамі. Аднак пралукашэнкаўскія тэлеграм-каналы ўжо распавялі імёны трох арыштаваных беларусаў.
Вось гэтыя імёны:
-
Мікалай Маскаленка, 1971 г. н.
-
Уладзіслаў Пасміцюха, 1994 г. н.
-
Марыя Мядзведзева, 2004 г. н.
На дадзены момант афіцыйнай інфармацыі з польскага боку пра гэтых людзей няма.
Чытайце таксама:
Палякі пачалі ставіць умацаванні на мяжы з Беларуссю ФОТА
Адновіцца авіязлучэнне з Іранам. Ці рызыкне Лукашэнка паўтарыць атаку мігрантамі?