Na volu vyjšaŭ palitviazień Maksim Ciškievič
Jon pravioŭ za kratami amal dva hady.
16.03.2023 / 12:23
Maksima zatrymali 21 krasavika 2021 hoda ŭ Minsku pa kryminalnaj spravie ab hrupavych dziejańniach, jakija hruba parušajuć hramadski paradak (art. 342 KK), paviedamlaje «Viasna».
Pavodle abvinavačvańnia, Maksim u noč z 9 na 10 žniŭnia 2020 hoda znachodziŭsia na praśpiekcie Mašerava, dzie dałučyŭsia da inšych pratestoŭcaŭ, vychodziŭ na prajeznuju častku darohi, publična vykrykvaŭ łozunhi, hučna plaskaŭ u dałoni i razmachvaŭ rukami, a taksama demanstravaŭ abraźlivyja žesty ŭ bok supracoŭnikaŭ milicyi.
16 žniŭnia 2021 hoda suddzia Centralnaha rajona Minska Dźmitryj Karsiuk asudziŭ jaho na dva hady pazbaŭleńnia voli ŭ kałonii ahulnaha režymu.
Termin Maksim adbyvaŭ u papraŭčaj kałonii №3 u Viciebsku. Niadaŭna palitviazień vyjšaŭ na volu. U źniavoleńni jon adbyŭ bolš za 1 hod i 10 miesiacaŭ.