«Вернуцца назад па камандзе і возьмуць удзел у вызваленні Беларусі». Азараў расказаў пра байцоў «Байпол», якія адправіліся ва Украіну
Нядаўна стала вядома, што неназваная колькасць удзельнікаў плана «Перамога» далучылася да палка Кастуся Каліноўскага ва Украіне. У размове з «Нашай Нівай» кіраўнік «Байпол» Аляксандр Азараў выдаў некаторыя дэталі гэтай гісторыі.
15.03.2023 / 11:30
Атрад «Атам», падрыхтоўкай якога займаўся «Байпол». Фота: прэс-служба палка Каліноўскага
Працягваецца далучэнне беларусаў да шэрагаў ваенных, якія бароняць і вызваляюць Украіну ў вайне супраць Пуціна і Лукашэнкі.
Нядаўна да самага вялікага фарміравання беларусаў — палка Кастуся Каліноўскага — далучылася чарговая група нашых землякоў. Папярэднюю падрыхтоўку праводзіў «Байпол».
«У Польшчы і Літве адбывалася спецпадрыхтоўка ўдзельнікаў плана «Перамога». У выніку, тыя людзі, якія выказалі жаданне адправіцца бараніць Украіну для атрымання баявога досведу, адправіліся ў полк імя Кастуся Каліноўскага, — расказаў Аляксандр Азараў, кіраўнік аб'яднання былых сілавікоў. —
Назва атрада — «Атам» — у гонар музыканта з Пінска Васіля Грудовіка, які быў удзельнікам плана «Перамога» і праходзіў курсы спецпадрыхтоўкі «Байпол», але, на жаль, загінуў, баронячы Украіну і Беларусь».
Аляксандр Азараў
Дакладная колькасць ваяроў не агучваецца.
«Але гэта было некалькі груп, якія па колькасці пераўзыходзяць колькасць асабовага складу батальёна «Літвін» палка Кастуся Каліноўскага. Таксама працягваецца далейшая падрыхтоўка наступных груп.
Першая група адправілася напачатку лютага. Гэта тыя людзі, якія выказалі жаданне ехаць ва Украіну, каб шляхам абароны братняй дзяржавы ад Крамля атрымаць баявы досвед.
У наступным яны будуць задзейнічаны ў рэалізацыі плана «Перамога» і павінны па камадзе вярнуцца назад і прыняць удзел у вызваленні Беларусі ад лукашысцка-расійскіх захопнікаў», — дзеліцца Азараў.
Далучыцца менавіта да палка Кастуся Каліноўскага пажадалі самі байцы.
«Перад адпраўкай была вывучана сітуацыя ва ўсіх беларускіх падраздзяленнях. Байцы прыйшлі да высновы, што ПКК найбольш адпавядае нашым патрэбам у плане таго, што ўсе будуць разам, адным падраздзяленнем, а не будуць раскіданы хто куды.
На дадзены момант байцы «Байпол» давучваюцца ва Украіне перад адпраўкай на фронт — зноў жа, у Польшчы ці ў Літве немагчыма адладжваць навыкі валодання гранатамётамі, мінамётамі, цяжкай зброяй. Гэта ўсё магчыма толькі на палігонах ва Украіне. На перадавой пакуль што нікога няма.
Сярод ваяроў атрада «Атам» — і айцішнікі, і звычайныя будаўнікі.
«Усе яны — актывісты-беларусы, якія бралі актыўны ўдзел у пратэстах 2020-га і зазналі пераслед, а некаторыя і здзекі, з боку рэпрэсіўных органаў лукашызму.
Людзі поўныя жадання адпомсціць катам беларускага народа і акупантам».
Раней «Байпол» расказваў пра стварэнне харугваў за мяжой. Іх удзельнікі займаюцца спортам, стралковай падрыхтоўкай, адзінаборствамі і «іншымі спецыяльнымі прадметамі» пад кіраўніцтвам інструктараў. Аднак не ўсе, хто пайшоў у харугвы, гатовыя ехаць ва Украіну.
«Для гэтага, натуральна, трэба адмовіцца ад ранейшай работы, ладу жыцця. І стаць салдатам, сяржантам, падпісаць кантракт з УСУ. Мы адпраўляем толькі тых, хто сам гэтага хоча і матываваны», — сказаў Азараў.
Чытайце таксама: