«Робіцца невыносна». Міністр эканомікі Сербіі заклікаў увесці санкцыі супраць Расіі
Міністр эканомікі Сербіі Радэ Баста выступіў за ўвядзенне санкцый супраць Расіі, ад чаго краіна раней устрымлівалася. Пра гэта ён напісаў у інстаграме.
13.03.2023 / 23:12
Міністр эканомікі Сербіі Радэ Баста. Фота: instagram.com/rade.basta/
«Наша краіна ўжо плаціць высокую цану за тое, што не ўводзіла санкцыі супраць Расіі, і гэта становіцца невыносным», — заявіў міністр.
Ён падкрэсліў, што, як міністр эканомікі, не можа змірыцца з тым, «які ціск аказваецца на прэзідэнта Сербіі Аляксандра Вучыча, а мы маўчым».
«Вось чаму я за ўвядзенне санкцый супраць Расіі, я падтрымліваю прэзідэнта Вучыча ў абароне дзяржаўных і нацыянальных інтарэсаў і цалкам яму давяраю. Вось чаму я прашу ўрад Сербіі і ўсіх міністраў зрабіць заяву па гэтым пытанні», — заявіў міністр.
На мінулым тыдні прэзідэнт Сербіі Аляксандр Вучыч заявіў, што не можа «паклясціся», што Сербія ў нейкі момант не ўвядзе санкцыі супраць Расіі праз яе поўнамаштабнае ўварванне ва Украіну.
Чытайце таксама:
Прэзідэнт Сербіі: Для нас Крым — гэта Украіна, і Данбас — гэта Украіна
Прэзідэнт Сербіі заклікаў Расію спыніць вярбоўку сербаў у «Вагнер»