U Biełarusi ŭ 2022 hodzie zapuścili tolki 26 novych startapaŭ

Za 2022 hod abjom inviestycyj u startapy biełaruskaha pachodžańnia skaraciŭsia amal u 19 razoŭ. Minuły hod možna śmieła nazvać pieryjadam tatalnaj niavyznačanaści dla inavacyjnaha rynku Biełarusi, havorycca ŭ piatym ahladzie startap-ekasistemy Biełarusi Belarus startup report 2023, padrychtavanym płatformaj Innovate Belarus.

13.03.2023 / 18:30

Da vajny Rasii z Ukrainaj, u jakoj chaŭruśnikam pieršaj vystupiŭ i režym Łukašenki, niahledziačy na šerah kryzisaŭ i ich nastupstvaŭ: pandemii Covid-19, masavaj addalenaj pracy i palityčnaj turbulentnaści, — biełaruskaja ekasistema zastavałasia častkaj suśvietnaha kamjunici i mieła całkam adčuvalnyja pierśpiektyvy raźvićcia. 

Ale 2022 hod staŭ hodam, jaki pierapyniŭ piacihadovy trend rostu, jaki naziraŭsia z 2017. Pa stanie na kaniec 2022 hoda analityki naličyli 380 bačnych i aktyŭnych prajektaŭ. U hetym Biełaruś pa-raniejšamu vielmi mocna sastupaje ekasistemam susiedziaŭ: Litvy (1490+), Łatvii (650+), Estonii (1450+) i Polščy (3500+).

Akramia taho, 53 prajekty spynili svajo isnavańnie, i tolki 26 novych startapaŭ było adkryta za toj ža pieryjad. Bolš za pałovu novych prajektaŭ adnosicca da čatyroch damienaŭ: Health, Education, Entertainment & Lifestyle, Jobs recruitment.

Klučavymi krynicami finansavańnia pa-raniejšamu zastajucca: ułasnyja srodki zasnavalnikaŭ (63%) i butstrepinh (43%). Tolki 33% startapaŭ kali-niebudź pryciahvali źniešniaje finansavańnie.

Vyśvietliłasia, što na momant praviadzieńnia apytańnia bolš za 65% pradstaŭnikoŭ startapaŭ nie asacyjuiuć siabie z biełaruskaj ekasistemaj i nie bačać pieravah u tym, kab być jaje častkaj. 85% respandentaŭ vyłučajuć palityčnuju napružanaść jak asnoŭny barjer dla raźvićcia startap-ruchu ŭ krainie. Kala 50% padkreślivajuć składanaści z pryciahnieńniem finansavańnia ŭnutry krainy, i 44% — vuzki ŭnutrany rynak.

Praces rełakacyi prykmietna paskoryŭsia: siońnia 56% prajektaŭ biełaruskaha pachodžańnia aficyjna zarehistravanyja ŭ inšych krainach. Akramia taho, za apošnija try hady było zakryta 82 startapy sa štab-kvaterami ŭ Biełarusi, i bolš za 150 startapaŭ źjechali z krainy. Hałoŭnyja pryčyny dla rełakacyi: palityčnaja ryzyka (71% pradstaŭnikoŭ), pytańni biaśpieki i reputacyjnaj ryzyki.

Nashaniva.com