«Jon prymusiŭ mianie havaryć z ludźmi». Brytanka raspaviała, jak vałačaščy sabaka z Minska staŭ jaje siabram i vyratavaŭ ad depresii
29-hadovaja Eleanora Boŭnes (Eleanor Bowness) z miastečka Kinhstan-on-Soar i jaje dvarniak Beła Roŭz dajšli da paŭfinału najbujniejšaha suśvietnaha sabačaha šou Crufts. Brytanskaje vydańnie Ealing Times raskazała historyju byłoj nastaŭnicy, jakaja lečycca ad depresii dziakujučy vyratavanamu sabaku z Biełarusi, zaŭvažyŭ reform.by.
13.03.2023 / 11:38
Fota: The Kennel Club / Beat Media
«Ja była na miažy samahubstva, kali my znajšli jaho, i jon, biez sumnievu, vyratavaŭ mnie žyćcio. Mianie b tut nie było bieź jaho», — raspaviadaje Eleanora.
Dvuchhadovy biazdomny sabaka znajšoŭsia praz vyratavalny centr PawHelpUK, i heta była «luboŭ z pieršaha pohladu». Arhanizacyja zajmajecca vyratavańniem sabak z Biełarusi i Ukrainy.
«Jon pryjechaŭ z vulic Minska ŭ Biełarusi, i pa jaho pavodzinach my možam skazać, što ŭ jaho byŭ vielmi ciažki pačatak žyćcia», — raspaviadaje byłaja nastaŭnica. Pavodle jaje słoŭ, raniejšyja haspadary žorstka abychodzilisia z žyviołaj.
«Ja ŭsio jašče zmahajusia, pracuju pakrysie. Raniej ja była nastaŭnicaj pryrodaznaŭčych navuk u siaredniaj škole, ale z taho času, jak u mianie zjaviłasia Beła, ja całkam pahruziłasia ŭ sabačy śviet. Ja pakinuła hetuju pasadu i ciapier pracuju niapoŭny pracoŭny dzień dresiroŭščykam sabak i spadziajusia stać majstram u halinie pavodzin žyvioł», — kaža brytanka.
Pośpiech dueta na najbujniejšaj u śviecie vystavie sabak demanstruje pieraŭtvaralny ŭpłyŭ na svojskich žyvioł, robić vysnovu vydańnie.
«Ja nikoli nie była čałaviekam, jaki razmaŭlaŭ z nieznajomcami, ale tak šmat ludziej cikaviłasia im, što jon prymusiŭ mianie havaryć z ludźmi», — dzielicca ŭražańniami ad udziełu ŭ konkursie Scruffts dla biesparodnych sabak Eleanora.
Vystava Crufts-2023 prachodziła z 9 pa 12 sakavika ŭ Nacyjanalnym vystavačnym centry Birminhiema.