Źjaviłasia videa z rasstrełam vajskoŭca, jaki kaža «Słava Ukrainie». Što pra heta viadoma?
Učora ŭ siecivie stała raspaŭsiudžvacca videa, na jakim rasstrelvajuć biazzbrojnaha čałavieka ŭ formie USU za voklič «Słava Ukrainie». Vajskoviec padaje, hołas za kadram praciahvaje łajacca.
07.03.2023 / 09:10
Dzie i kali zrobleny zapis, nieviadoma. Asoba mierkavanaha zahinułaha — taksama. Va ŭkrainskich SMI źjaviłasia viersija, što na videa — vajskoviec 72 bryhady «Čornych Zaparožcaŭ» z pazyŭnym «Mahnit», adnak žurnalist Juryj Butusaŭ abvierh heta.
Rasijskija Z-pabliki vykazvajuć roznyja viersii — ad poŭnaj pastanoŭki da rasstrełu rasijskaha pałonnaha, pierapranutaha ŭ formu USU.
Kanał «Grey Zone» (jaho źviazvajuć z PVK «Vahnier») piša, što ničoha dziŭnaha nibyta ŭ kadrach niama: «U nas skłałasia pakaleńnie kantent-vajaroŭ. Kožny choča vyznačycca pryhožaj fota ci videa z vajny. Kab pasłać dadomu pa WhatsApp pacanam abo ŭ vajskovuju čaść».
Na videa adreahavali ŭkrainskija aficyjnyja asoby.
«Siońnia zjaviłasia videa, jak akupanty pa-źviarynamu zabili voina, jaki śmieła skazaŭšy im u vičy: «Słava Ukraije!» Chaču, kab my ŭsie razam adkazali na jahonyja słovy: «Hieroju słava! Hierojam słava! Ukrainie słava!». I my znojdziem zabojcaŭ», — zajaviŭ u viečarovym zvarocie Uładzimir Zielenski ŭviečary 6 sakavika.
Hienprakuratura Ukrainy raspačała kryminalnuju spravu ab parušeńni zakonaŭ i zvyčajaŭ vajny. Ministr zamiežnych spraŭ Ukrainy Dźmitryj Kuleba źviarnuŭsia da prakurora Mižnarodnaha kryminalnaha suda Karyma Chana i zapatrabavaŭ pravieści rasśledavańnie.
Rasijskija ŭłady pakul nie kamientavali videa. Aficyjnyja prakramloŭskija SMI taksama maŭčać.