Chto zavozić u Biełaruś šakaład Ritter Sport, jaki trapiŭ pad łukašenkaŭskija «kontrsancyi»?
Kampanija-imparcior šakaładu Ritter Sport zarehistravanaja na brata dziełavoj partniorki Siarhieja Ciacieryna. Ź im jana nieadnarazova lotała na adpačynak u kampanii Alaksandra Łukašenki, piša Biełaruski rasśledavalnicki centr.
06.03.2023 / 19:07
Ich krynica z fud-industryi Biełarusi śćviardžaje, što realna kantrabandaj šakaładu zajmajecca kampanija Ciacieryna «BiełHłobałHarant». U biznes-kołach u kursie, što jana atrymała ekskluziŭnaje prava na impart zabaronienaha prysmaka, ale čynoŭnikam pra heta nieviadoma.
Fota: BRC
Jak ciapier zavoziać Ritter Sport
U biełaruskija kramy viarnuŭsia niamiecki šakaład Ritter Sport. U prodažy jaho nie było amal uvieś minuły hod praz tak zvanyja «kontrsankcyi» na pradukcyju JeS. Ich svaim asabistym ukazam uvioŭ Alaksandr Łukašenka, a zatym zacvierdziŭ Saviet Ministraŭ. U śniežni 2022-ha Ministerstva antymanapolnaha rehulavańnia i handlu padoŭžyła hetuju zabaronu jašče na paŭhoda. Ale na palicy šakaład viarnuŭsia, tolki padaražeŭ.
Heta mahło adbycca dziakujučy niuansam «kontrsankcyjnaha» zakanadaŭstva. Impartavać u Biełaruś zabaronienyja jeŭrapiejskija pradukty ŭsio jašče možna. Dla hetaha treba atrymać śpiecyjalnyja kvoty ad MARH. Pad vyhladam patencyjnych imparcioraŭ žurnalisty BRC patelefanavali ŭ ministerstva, kab daviedacca, jak atrymać taki dazvoł. Adnak tam adkazali, što padobnyja kvoty pakul nie vydajucca.
Vychodzić, šakaład Ritter Sport — heta, pavodle biełaruskich zakonaŭ, kantrabanda. Chto ž impartuje jaho z Niamieččyny, parušajučy ŭkaz Łukašenki?
Na kožnaj upakoŭcy — nalepka «pastaŭščyk «Łahistyčnaja kampanija Uschod».
Vałodaje hetaj kampanijaj niejki Alaksiej Macviejeŭ.
Jaho imia znajšli ŭ śpisach supracoŭnikaŭ kampanii «BiełHłobałStart» za 2020 hod.
Firmaj z padobnaj nazvaj — «BiełHłobałTon» — vałodaje i kiruje jaho siastra Taćciana Macviejeva.
Abiedźvie kampanii zasnavaŭ Siarhiej Ciacieryn, blizki da Łukašenki biznesoviec.
Mienavita Ciacieryn kałoŭ z Łukašenkam drovy, abiacajučy sahreć Jeŭropu, i padymaŭ ź im čarku harełki za pieramohu Aryny Sabalenki na Australian Open. U 2021 hodzie jon jak «kašalok» Łukašenki trapiŭ pad sankcyi JeS.
Łukašenka i Ciacieryn pjuć za pieramohu Aryny Sabalenki na Australian Open. Skrynšot videa kanała «Puł pieršaha»
Parušaje «łahistyčnaja kampanija Uschod» i antymanapolnaje zakanadaŭstva. Žurnalisty patelefanavali ŭ firmu «Alfa-Dystrybucyja», jakaja raniej impartavała Ritter Sport u Biełarusi. Tam raspaviali, što pierastali ŭvozić niamiecki šakaład, jak tolki ŭvajšła ŭ dziejańnie zabarona biełaruskich uładaŭ.
Ad krynicy, jakaja pracuje na bujnoha imparciora praduktaŭ charčavańnia ŭ Biełarusi, žurnalisty daviedalisia, što hetaja firma — šyrma, za jakoj staić «BiełHłobałHarant», jašče adna kampanija Ciacieryna. Toj ža insajder paviedamiŭ, što mienavita «BiełHłobałHarant» atrymała ekskluziŭnaje prava na impart niamieckaha šakaładu.
Žurnalisty źviazalisia z «BiełHłobałHarant», i supracoŭniki kampanii sapraŭdy akazalisia ŭ kursie handlu Ritter Sport.
Chto takaja Taćciana Macviejeva?
U 2014 hodzie Ciacieryn i Łukašenka amal na na dva tydni palacieli na adpačynak u AAE. Kampaniju im skłała Taćciana Matviejeva — taja samaja siastra ŭładalnika «Łahistyčnaj kampanii Uschod», jakaja ciapier zajmajecca kantrabandaj niamieckich šakaładak u Biełaruś.
U 2016 hodzie Łukašenka i Ciacieryn adpravilisia ŭ ŭ Dochu, ale asnoŭny čas, padobna, znoŭ praviali ŭ Emiratach. Była na borcie i Taćciana Macviejeva.
U 2014 hodzie Macviejeva razam z Siarhiejem Ciacierynym i Mikitam Šatrom zasnavała kampaniju «BiełHłobałTon». Firma handlavała meblaj i pradmietami interjeru.
Macviejeva zajmałasia dyzajnam jak IP. Mienavita ŭ jaje «BiełHłobałStart», inšaja kampanija Ciacieryna, zamoviła raspracoŭku firmovaha stylu kinabaraŭ «Błokbastar».
Afarmlała Macviejeva i bar «Svabody.4» u Minsku, jaki adkryła dačka Siarhieja Ciacieryna i jaje znajomyja.
Jana ž zajmałasia łaźniaj Ciacieryna ŭ Aleksandryi, miarkujučy pa elektronnym liście, jaki žurnalisty znajšli na Aleph.
BRC taksama znajšoŭ dakumienty, pavodle jakich Macviejeva płanavała redyzajn i pierašyŭku hardzin dla kampanii «Biełnaftahaz» Alaksieja Aleksina. A paśla pavinna była pastavić joj štory amal za $35 tysiač.
Pad kiraŭnictvam Macviejevaj kampanija «BiełHłobałTon» adkryła ŭłasnuju kramu ŭ handlovym centry «Trum» i zaklučyła dahavory na pastaŭku mebli z Kitaja na dziasiatki tysiač dalaraŭ. Naprykład, zakaz u kitajskaha brenda Rich Collection abyšoŭsia firmie ŭ $17 tysiač.
Adnak u apošnija hady «BiełHłobałTon», miarkujučy pa finansavych spravazdačach, viadzie davoli ścipłuju kamiercyjnuju dziejnaść.
Rasśledavańnie całkam čytajcie pa spasyłcy.