Paśla dyviersii ŭ Mačuliščach pa ŭsioj krainie adbyvajucca abłavy i pieratrusy
Pra heta «Našaj Nivie» paviedamlajuć ludzi z roznych miascovaściej.
05.03.2023 / 16:04
Siłaviki prychodziać z vobšukami da roznych ludziej pry padazreńni na datyčnaść da ataki na rasijski samalot-raźviedčyk A-50 na aeradromie Mačuliščy 26 lutaha.
«Zdajecca, dziejničajuć mietadam «palcam u nieba». Chodziać da tych, u kaho jość drony, lehkamatorniki, chodziać pa ludziach, jakija žyvuć vakoł Mačuliščaŭ», — napisaŭ nam čałaviek z Biełarusi.
Viadoma taksama, što ŭsich, chto vyjazdžaje z Biełarusi za miažu, uzmocniena praviarajuć i navat dapytvajuć. Toje samaje adbyvajecca ŭ tym liku na miažy Biełarusi i Rasii.
Kali vy viedajecie bolš i vaša infarmacyja moža dapamahčy inšym ludziam źbierahčy svabodu, pišycie redaktaru «Našaj Nivy» ŭ TH, na nivanasha@gmail.com ci nivanasha@proton.me. Albo pišycie asabista tym žurnalistam i redaktaram «Našaj Nivy», jakich vy viedajecie i jakim daviarajecie (lepš — u sihnał ci telehram).
Nahadajem, što inicyjatyva siłavikoŭ suprać dyktatury BYPOL 26 lutaha paviedamiła, što na vajskovym aeradromie Mačuliščy pad Minskam ranicaj taho ž dnia prahučali dva vybuchi, jakimi byŭ paškodžany rasijski samalota dalokaj radyjołakacyjnaj raźviedki A-50.
BYPOL paviedamiŭ, što dyviersiju ažyćciavili ŭdzielniki płana «Pieramoha» i što vybuchi paškodzili piaredniuju i centralnuju častki samalota. Paźniej zjavilisia videa, jak bieśpiłotniki padpolščykaŭ padlatajuć i siadajuć na kabinu i radar samalota.
Kiraŭnik BYPOL Alaksandr Azaraŭ zajaviŭ, što samym składanym było padrychtavać evakuacyju ludziej, jakija ŭ hetym udzielničali. Azaraŭ nie staŭ raskryvać padrabiaznaści apieracyi.
Biełaruskija aficyjnyja SMI i praŭładnyja błohiery čatyry dni nijak čynam nie kamientavali taho, što zdaryłasia ŭ Mačuliščach.
«Nie vyklučaju, što mohuć zatrymlivać aktyvistaŭ i prypisvać im udzieł u płanie «Pieramoha», — dapuskaŭ Azaraŭ.
Isnuje taksama viersija, što za dyviersijaj mahli stajać nie biełaruskija partyzany, a ŭkrainskija śpiecsłužby.
«Kožny ahučvaje viersiju, jakaja jamu vyhadnaja. Kab my nie viedali dakładna, što heta biełaruskija partyzany, to ničoha b nie kazali. Łukašysty kažuć, što nami kirujuć śpiecsłužby zamiežnych dziaržaŭ, heta niapraŭda. Biełaruskija partyzany pracujuć samastojna. Niachaj łukašysty čakajuć praciahu», — kazaŭ kiraŭnik BYPOL.
Rasijski samalot dalokaj raźviedki DRŁV A-50 kaštuje bolš za 330 miljonaŭ dalara. Usiaho takich samalotaŭ u Rasii, spraŭnych i niaspraŭnych, dzieviać. Jon vykarystoŭvaŭsia dla naviadzieńnia rasijskich rakiet na celi va Ukrainie.
BYPOL śćviardžaŭ, što samalot bolš nie ŭźlacić. U svaju čarhu, łukašenkaŭcy paźniej stali śćviardžać, što z samalotam absalutna ničoha nie zdaryłasia. Samalot, adnak, 2 sakavika ŭźlacieŭ i pieralacieŭ na ramont u rasijski Tahanroh, što moža aznačać, što paškodžańni nie mahli być paramantavanyja na miescy, adnak byli nie nastolki surjoznyja, kab mašyna nie mahła latać.