«Padzie Krym». Pryhožyn dapuskaje, što abvał frontu moža pačacca pad Bachmutam
Kiraŭnik pryvatnaj vajskovaj kampanii «Vahnier» Jaŭhien Pryhožyn pradrakaje, što praryŭ frontu ŭkrainskaj armijaj moža zdarycca ŭ bližejšyja miesiacy. Vahnieraŭcy sutykajucca sa «snaradnym hoładam», kaža Pryhožyn.
05.03.2023 / 12:50
Jaŭhien Pryhožyn. Skryn z videa
Jaŭhien Pryhožyn ličyć svaju hrupoŭku aporaju rasijskich vojskaŭ u Łuhanskaj vobłaści.
Pa słovach Pryhožyna, kali rasijskamu vojsku było ciažka, jamu ŭdałosia pierakanać Pucina ŭ nieabchodnaści ŭdziełu vahnieraŭcaŭ u vajnie va Ŭkrainie. Jany stali «na Bachmucie pierałomvać i kancentravać na sabie ŭkrainskuju armiju».
Pryhožyn pryznaje: kali ŭkrainskaje vojska prarviecca, to vahnieraŭcy zastanucca ŭ historyi, jak «ludzi, jakija zrabili asnoŭny krok u projhryšy ŭ vajnie».
Pa jaho słovach, ciapier vahnieraŭcy sutykajucca sa «snaradnym hoładam» i zavualavana, słovami svaich bajcoŭ, davodzić, što toje robicca ŭmyśla.
«A ci nie mohuć hetu historyju razyhryvać dzieści ŭ hłybiniach Ministerstva abarony, a moža i vyšej, kab patłumačyć usiamu rasijskamu narodu, čamu adbylisia ŭ nas takija niepryjemnaści. A raptam jany chočuć padstavić nas i skazać, što my niahodniki i, tamu nam nie dajuć bojeprypasy, ŭzbrajeńnie i nie dajuć papaŭniacca asabovym składam, u tym liku zaniavolenymi», — davodzić Pryhožyn.
Jon dadaje: kali adbudziecca praryŭ frontu, to ŭ historyi zastaniecca farmuloŭka ab tym, što hrupa najomnikaŭ nie damoviłasia z kiraŭnictvam dziaržavy, Ministerstva abarony, Minfinam i rezka adskočyła ad Bachmutu.
«Napružanaja ŭkrainskaja armija źleva, sprava pa fłanhach i ŭ centry ŭvarvałasia na terytoryju ŁNR, źmiała Łuhansk, Krasnadon, vyjšła na terytoryju Rasii. Armija vymušana była sprabavać stabilizavać front i pasypalisia fłanhi. Dalej padzie Krym, i budzie šmat inšych niepryjemnaściaŭ», — prahnazuje Pryhožyn.
Pryvatnaja vajskovaja kampanija Vahniera stvoranaja ŭ 2013 hodzie nabližanym da Pucina byłym kryminalnikam z Pieciarburha Jaŭhienam Pryhožynym dla ŭdziełu va ŭzbrojenych kanfliktach biez pryciahnieńnia rehularnych vojskaŭ. Jaje kamplektujuć rasijskimi i zamiežnymi najmitami, asudžanymi kryminalnikami.
Jana ŭdzielničaje ŭ bajavych dziejańniach na ŭschodzie Ukrainy z 2014 hoda. Vahnieraŭcy vajavali ŭ Siryi na baku sajuźnika Rasii režymu Asada, u Sudanie, Livii, Centralnaafrykanskaj Respublicyi i Mali. Ich padazrajucca ŭ šmatlikich vajennych złačynstvach, złačynstvach suprać čałaviečnaści.
U 2023 hodzie Ministerstva finansaŭ ZŠA pryznała hetuju strukturu transnacyjanalnaj złačynnaj arhanizacyjaj, a Viarchoŭnaja Rada Ukrainy — mižnarodnaj złačynnaj arhanizacyjaj.