Vajskoŭcy rasijskaj bryhady admovilisia vajavać va Ukrainie. Kamandziry abvinavacili ich u durnych dumkach z-za ałkaholu
Vajskoŭcy 126-j bryhady bierahavoj abarony Čarnamorskaha fłota dasłali vydańniu «7ch7» šeść rapartaŭ ab zvalnieńni tavaryšaŭ pa słužbie. Usiaho zajaŭ, jak śćviardžajecca, kala 20. Bajcy prosiać kamandavańnie zvolnić ich u suviazi z nievykanańniem umoŭ kantraktu i spasłalisia na punkt zakona «Ab vajskovaj słužbie».
04.03.2023 / 17:13
126-ja bryhada z Kryma ciapier jana znachodzicca na rasijskim apornym punkcie va Ukrainie. Jak śćviardžaje surazmoŭca «7ch7», sałdatam zabaranili chadzić u adpačynak. Paśla napisańnia rapartaŭ da vajskoŭcaŭ pryjechali kamandziry, jakich nibyta «ŭ vočy nichto nie bačyŭ niekalki miesiacaŭ».
Kamandavańnie stała praviarać usie pasyłki i, jak miarkujecca, zabirać taktyčnyja rečy, ježu i ałkahol. «Kažuć, što ałkahol utvaryŭ u hałovach jazvy z-za jakich tudy traplajuć durnyja dumki», — pracytavaŭ kiraŭnictva kantraktnik.
Jon dadaŭ, što bryhada vyrašyła admovicca vajavać «pa mierkavańniach sumleńnia». Na pytańnie, čamu mienavita ciapier, małady čałaviek adkazaŭ, što, kali ŭsio pačałosia, jany «pryjechali vyzvalać nasielnictva ad nacystaŭ», ale ludzi akazalisia suprać». Tady jon nibyta pačaŭ sumniavacca.
«Ciapier nas jašče bolš nakručvajuć. Pravodziać infarmavańnie, u jakim raskazvajuć, jakija ŭkraincy h***ny i jak jany bjuć pa našych haradach. Ale my ž robim hetak ža», — napisaŭ kantraktnik.