Žurnalisty dziaržSMI pravieryli, ci źbirajucca prychilniki «PVK Rodan» u haradach Minskaj vobłaści. I vyjavili sum i soram pravincyi
Žurnalisty «Minskaj praŭdy» pajechali pa roznych haradach Minskaj vobłaści, kab na svaje vočy pabačyć tusoŭki prychilnikaŭ moładzievaj subkultury — tak zvanaj «PVK Rodan», jakaja raptoŭna z’javiłasia ŭ sacsietkach. Ale pabačyli jany zusim inšaje.
04.03.2023 / 15:49
«Fanipal. U horadzie praktyčna niama miescaŭ, dzie sustrakajecca moładź. Hrupy padletkaŭ časta «tusujucca» na dziciačych placoŭkach abo ŭ miascovym biznes-centry — usiaredzinie jaho i zvonku, kali ciopła».
«Salihorsk. Uvachod u «Burger King» — miesca tusovak padletkaŭ». Tam žurnalisty pabačyli kala 10 tynejdžaraŭ, «u asnoŭnym, dziaŭčaty». «Milicyja nie pryjazdžała. Situacyja, zdajecca, štatnaja», — robiać vysnovu žurnalisty, jakija pabačyli zvyčajnych padletkaŭ.
Dalej. «Smalavičy. U horadzie asablivych tusovačnych miescaŭ niama», — kanstatuje «Minskaja praŭda».
«Łahojsk. Placoŭka na aŭtastancyi — adno z papularnych miescaŭ tusovak moładzi. Siońnia tut usio cicha».
Barysaŭ. Tut žurnalisty pryjšli da HC «Mandaryn» jak da tusovačnaha miesca dla moładzi.
«Šmatludna, u pryncypie, jak i kožnuju piatnicu». Moładzi ŭ HC pabačyli šmat, a voś rodanaŭcaŭ nie znajšli.
«Vidać, takich tut siońnia i nie było», — robić vysnovu žurnalist.
U piaci haradach Minskaj vobłaści, jak vynikaje z repartažu, moładź moža tolki tusavacca na dziciačych placoŭkach, u parkach, kali ciopła, kala aŭtavakzałaŭ i handlovych centraŭ. Dziva, što padletki ŭ roznych haradach Biełarusi sotniami prychodzili pahladzieć na niejki zahadkavy «Rodan».