Biełaruski brend ZNWR paśla rezanansu admoviŭsia ad supracoŭnictva z rasijskim fondam, jaki dapamahaje mabilizavanym
Infarmacyja ab supracy biełaruskaha brenda ZNWR z fondam, jaki, siarod inšaha, dapamahaje rasijskim mabilizavanym, vyklikała ŭ siecivie skandał. Zasnavalnik brenda Maksim Hanisieŭski ŭ instahramie raspavioŭ, što ZNWR šukaje inšaha partniora dla supracy i vykazaŭ svaje kryŭdy na tych, chto sam nikomu nie dapamahaje, a tolki piša kamientary.
04.03.2023 / 10:19
Fota: znwr.minsk / Instagram
Hanisieŭski napisaŭ, što artykuły ŭ SMI pra supracoŭnictva brenda z fondam «Prosta» «skažajuć realnuju situacyju». Pavodle jaho, u pačatku śniežnia 2022 hodu ŭ ZNWR vyrašyli znajści fond, praz jaki jany buduć dapamahać siemjam, što majuć patrebu, i addavać im rečy brendu, jakija jany nie mohuć pradać ci puścić na pierapracoŭku.
Fond «Prosta», pavodle Hanisieŭskaha, heta «najbujniejšy fond, jaki za minuły hod dapamoh 30 tysiačam małazabiaśpiečanym siemjam, i jaki ŭ toj ža čas zajmajecca pierapracoŭkaj rečaŭ»
Zasnavalnik ZNWR zapeŭnivaje, što nidzie nie bačyŭ infarmacyi, što fond «Prosta» dapamahaje rasijskim mabilizavanym.
Pavodle jaho, paźniej vyśvietliłasia, što heta była «razavaja pryvatnaja inicyjatyva niekatorych udzielnikaŭ fondu» i dapamoha «zaniała mienš za 0,1% ad jaho dziejnaści».
Hanisieŭski piša, što brend ZNWR «nikoli nie mieŭ nijakaha dačynieńnia da militarysckich prajektaŭ», bo heta «supiarečyć fiłasofii i kaštoŭnaściam brenda».
Jon zajaviŭ, što jahonaja kampanija ŭvieś čas zajmałasia dabračynnaściu, ładziła takija prajekty ŭ Biełarusi: pieradavała rečy ŭ prajekt «Kaliłaska», Čyrvony Kryž, adziavali biazdomnych pierad chaładami, rychtavali padarunki dzieciam u dziciačych damach i Biełaruskim dziciačym chośpisie, kuplali drovy dla piensijanieraŭ i inš.
Hanisieŭski piša, što ryzykujučy zakryćciom, ZNWR abkleiŭ vitryny kramaŭ u Maskvie i Sankt-Pieciarburhu słohanam «People for peace» («Ludzi za mir»).
«I ciapier u nas byŭ čysty matyŭ, i heta nasamreč kryŭdna, kali ty robiš dabračynny prajekt, a ciabie ŭsio roŭna palivajuć brudam», — piša Hanisieŭski.
«Chaj kožny, chto napisaŭ nam kamientar z abvinavačvańniem, česna spytaje ŭ siabie, a što zrabiŭ kankretna jon, kab niekamu dapamahčy?»
Niahledziačy na ŭsie abstaviny, kampanija vyrašyła spynić supracoŭnictva z fondam «Prosta», bo «suprać lubych prajektaŭ, źviazanych z militaryzmam», i ciapier šukaje novych partnioraŭ, paviedamiŭ Maksim Hanisieŭski.
Dyzajnierski brend ZNWR viadomy svaimi chudzi i cišotkami. Jon zjaviŭsia ŭ Babrujsku, ale z časam zavajavaŭ nie tolki biełaruski rynak. U Rasii ŭ ich — taksama sietka kramaŭ.