Dzie šukać kažana-hihanta i raboha suślika? 7 zachaplalnych faktaŭ pra dzikuju pryrodu Biełarusi
Pad Niaśvižam znachodzicca samaja vialikaja kałonija rabych suślikaŭ u Jeŭropie, a na paleskich bałotach žyvie kažan-hihant. Pra cikavostki biełaruskaj pryrody piša kanał «Dzikaja pryroda pobač».
03.03.2023 / 21:00
Skrynšot z videa Biełaruś-1
1. Palessie — samy vialiki rehijon Jeŭropy z amal niekranutymi vodna-bałotnymi ŭhoddziami. Jaho nazyvajuć jeŭrapiejskaj Amazonijaj. Biełaruskaje Palessie zajmaje amal tracinu płoščy krainy.
2. U Biełarusi byli adkryty novyja dla navuki raśliny: kazłabarod biełaruski i šalnik rańni. Jany sfarmiravalisia va ŭnikalnych pryrodnych umovach Palessia, jakija mała źmianilisia za apošnija tysiačahoddzi.
3. Prypiackija dubrovy — najbolš zachavanyja ŭ naturalnym stanie pojmavyja lasy va ŭsioj Jeŭropie. Viasnoj, kali pavodki, možna litaralna płavać na łodcy pamiž drevami.
Dziakujučy prastory pojmavyja duby šyrokija i razhalistyja, niekatoryja — bolš za mietr u dyjamietry stvała. Na hetych dubach šmat ran i dupłaŭ, u jakich sielacca žyvioły, u tym liku redkija puhač, sivahrak, biełaja sinica, sonia-pałčok i roznyja vidy kažanoŭ.
4. Pad Niaśvižam znachodzicca samaja vialikaja kałonija rabych suślikaŭ u Jeŭropie — i adna z apošnich u Biełarusi. Jana achoŭvajecca dziaržavaj. Jaje płošča składaje bolš za 90 ha, tut pražyvaje bolš za 5000 suślikaŭ!
5. U Biełarusi hniazdujecca druhaja ŭ śviecie pa pamierach papulacyja vialikich arlacoŭ, jakim pahražaje hłabalnaje źniknieńnie. Bolšaść ich rodam z Palessia. Zaraz pačynajecca ich mihracyja z miescaŭ zimoŭki.
6. U našaj krainie hniazdujecca samaja vialikaja ŭ śviecie papulacyja viartlavaj čarotaŭki. Heta samaja redkaja pieŭčaja ptuška kantynientalnaj Jeŭropy.
Častku ptušak pierasialili z respublikanskaha zakaźnika «Zvaniec» u litoŭski reziervat «Žuvintas», dzie jany amal źnikli. Heta byŭ pieršy ŭ śviecie paśpiachovy ekśpierymient z transłakacyjaj vierabjinych ptušak — dalnich mihrantaŭ.
Paleski zakaźnik «Zvaniec» — heta najvialikšaje ŭ Jeŭropie asakovaje bałota i najbujniejšaje ŭ śviecie miesca hniezdavańnie viartlavaj čarotaŭki: tut hniazduje 27% hłabalnaj kolkaści vidu.
7. Na paleskich bałotach žyvie samy redki i samy vialiki kažan Jeŭropy — hihanckaja viačernica. Jana važyć 80 hramaŭ i moža palavać navat na drobnych ptušak!
Hety vid pieraadkryŭ dla Biełarusi ŭ 2015 hodzie zaołah Valer Dambroŭski ŭ paleskim zakaźniku «Stary Žadzien», jaki razam z zakaźnikam «Almanskija bałoty» ŭtvaraje adzin z najvialikšych u Jeŭropie lesa-bałotnych kompleksaŭ.
Dahetul u krainie hety vid nazirali tolki adnojčy ŭ 1930 hodzie. Najbližejšyja miescy, dzie razmnažajucca hetyja kažany, — Vienhryja na zachadzie i Uralskija hory na ŭschodzie.