Žurnalisty acanili kolkaść mabilizavanych u Rasii ŭ 528 tysiač čałaviek
Žurnalisty internet-vydańnia «Miedyjazona» praz čatyry miesiacy paśla aficyjnaha zakančeńnia «častkovaj» mabilizacyi vyvučyli danyja ab terminovych šlubach mužčyn z pozvami.
03.03.2023 / 20:58
Try siamiejnyja pary, jakija pabralisia šlubam u administracyi p. Sievierny Biełharodskaha rajona. Usie chłopcy — z h. Čalabinsk. Fota: staronka addzieła ZAHS administracyi Biełharodskaha rajona va «UKantakcie»
21 kastryčnika 2022 hoda mabilizavanym pry pradjaŭleńni paviestki dazvolili brać šlub u dzień padačy zajavy, biez miesiačnaha terminu čakańnia. Aficyjnaja rehistracyja adnosin dazvalała žoncy zapytvać infarmacyju ab svaim mužu, a taksama raźličvać na kampiensacyi ŭ vypadku jaho hibieli na froncie. Šluby rehistravalisia jak pa miescy žycharstva mabilizavanych, tak i pa miescy słužby.
I tady ž «Miedyjazona» prapanavała svoj mietad acenki maštabaŭ mabilizacyi: pa kolkaści ŭziatych u paskoranym paradku šlubaŭ. Pieršy analiz byŭ praviedzieny ŭ kastryčniku 2022 hoda, druhi, udakładnieny, — u lutym 2023-ha.
Danyja byli atrymany ci niepasredna z ZAHSaŭ ci šlacham paraŭnańnia z ličbami šlubaŭ za papiaredni hod. Zatym byli ŭziaty źviestki z mikrapierapisu 2015 hoda ab kolkaści rasijan, jakija žyvuć nie ŭ aficyjnym šlubie. Kab atrymać dolu mabilizavanych, kolkaść terminovych šlubaŭ była padzielena na kolkaść sužycielaŭ. Zatym jana była pamnožana na ahulnuju kolkaść mužčyn mabilizacyjnaha ŭzrostu. Tak było zroblena dla kožnaha rehijona.
Žurnalisty adznačajuć, što pik takich šlubaŭ pryjšoŭsia na kastryčnik. U nastupnyja miesiacy naziraŭsia spad.
Jany atrymali źviestki z 50 rehijonaŭ, na jakija prypadaje tolki 56 % mužčyn mabilizacyjnaha ŭzrostu. Danyja dazvolili vyvieści dolu mužčyn-sužycielej, jakija ažanilisia ŭ vieraśni-kastryčniku, u 1,42%. U pieraliku na ŭsio mužčynskaje nasielnictva hetych rehijonaŭ mabilizacyjnaha ŭzrostu (18—49 hadoŭ) žurnalisty atrymali pakazčyk 239 tysiač čałaviek.
Da hetych źviestak žurnalisty dadali kolkaść šlubaŭ, jakaja pieraŭzychodzić pakazčyki papiaredniaha hoda. Heta było zroblena pa 35 rehijonach, jakija nie pradstavili źviestak.
Takim čynam jany atrymali kolkaść mabilizavanych za vierasień-kastryčnik 2022 hoda — heta amal 528 tysiač čałaviek (527 703), što składaje 1,79 % usich mužčyn mabilizacyjnaha ŭzrostu.