Rola Rasii ŭ ekanomicy Hiermanii stanovicca marhinalnaj
Uschodni kamitet niamieckaj ekanomiki padvioŭ vyniki hiermana-rasijskaha handlu ŭ 2022 hodzie. I jon nie bačyć pierśpiektyvaŭ dla palapšeńnia situacyi ŭ budučyni, piša DW.
03.03.2023 / 16:02
Fota: pixabay.com
«Pastaŭki z Hiermanii ŭ Rasiju ŭ 2022 hodzie dramatyčna źmienšylisia, skłaŭšy tolki 15 miljardaŭ jeŭra, što na 12 miljardaŭ abo na 45% mienš, čym u davajennym 2021 hodzie, heta značyć amal na pałovu, — kanstatavaŭ vykanaŭčy dyrektar Uschodniaha kamiteta niamieckaj ekanomiki Michael Charms (Michael Harms). — Tym samym Rasija abvaliłasia z 15 miesca ŭ śpisie najvažniejšych niamieckich ekspartnych rynkaŭ na 23-je».
Vakuum u niamieckim źniešnim handli Rasija nie pakinuła. U cełym minuły hod staŭ dla Uschodniaha kamiteta rekordnym. Abjom handlu z krainami rehijona pavialičyŭsia na 12% i dasiahnuŭ u 2022 hodzie 562 miljardy jeŭra. Heta bolš, čym handal FRH z KNR i ZŠA razam uziatymi.
Pry hetym najvažniejšymi handlovymi partniorami Hiermanii ŭ hetym rehijonie zastajucca Polšča i Čechija, jakija ŭžo daŭno abahnali Rasiju, zaraz da ich dałučyłasia i Vienhryja, pryčym sa značnym adryvam ad RF. Polšču Charms nazvaŭ asabliva «ŭražlivaj historyjaj pośpiechu».
Pavodle acenki Uschodniaha kamiteta, u ahladnaj pierśpiektyvie narmalnych ekanamičnych adnosin z Rasijaj u Hiermanii nie budzie. «Źmieny mahčymyja tolki ŭ tym vypadku, kali ŭ Maskvie voźmie vierch pryncypova inšaja palityka», — rastłumačyŭ Charms.
Jon raspavioŭ ab tym, što mnohija jaho surazmoŭcy z liku kiraŭnikoŭ, jakija ŭvachodziać va Uschodni kamitet navat nie raźličvajuć dažyć da takoha momantu. «Temu Rasii jany stratehična ŭžo śpisali, i ja nie baču patencyjału dla raźvićcia hiermana-rasijskich ekanamičnych adnosin u budučyni», — pryznaŭsia Charms u intervju DW.