«Niełajalnych» futbalistaŭ adchilajuć ad hulniaŭ
Pierad samym čverćfinałam Kubka Biełarusi Minsportu zabaraniŭ 8 hulcam brać udzieł u matčach. U «Niomanie» pad udar patrapiła lehienda kłuba, u «Słucku» — 2 bramniki, piša «Trybuna».
03.03.2023 / 14:09
U hetyja vychodnyja adbuducca pieršyja matčy čverćfinału Kubka Biełarusi. Dva pajadynki pryznačanyja na subotu i dva na niadzielu. Praŭda, los trafieja budzie vyrašacca nie tolki na futbolnym poli i nie tolki pa-spartyŭnym pryncypie, bo ŭ spravu ŭmiašalisia čynoŭniki, jakija nibyta pavinny raźvivać sport. Za niekalki dzion da hulniaŭ u kłuby pastupiła rasparadžeńnie prypynić albo nie zaklučać kantrakty z šeraham futbalistaŭ. Niekatoryja ź ich rychtavalisia da kubkavych sustreč i hulali važnuju rolu ŭ svaich kłubach.
«Nioman»: paprasili na vychad navat lehiendu
Hetaje mižsiezońnie ŭ hrodzienskaj kamandy atrymlivajecca vielmi šmatabiacalnym. Kamanda Ihara Kavaleviča, jaki pierapadpisaŭ z FK kantrakt užo siomy raz, tolki raz prajhrała — u samym pieršym matčy zimy minskamu «Dynama» 0:6. A paśla vydała 12-matčavuju biasprojhryšnuju sieryju z 28 halavymi ŭdarami i siamju «suchimi» hulniami. Pryčym za čas sieryi «Nioman» paśpieŭ uziać dva trafiei. Spačatku staŭ čempijonam na turniry «Biełazaviec» u Žodzinie, dzie abyhraŭ bresckaje «Dynama», dubl «Tarpieda-BiełAZ» i pieršuju kamandu «aŭtazavodcaŭ». A praz dva tydni hrodziency stali najlepšymi na štohadovym turniry Winter Cup u Breście (pieramahli «Naftan», «Słuck» i miascovaje «Dynama»).
U śviatle takich pośpiechaŭ Kavalevič zahavaryŭ pra toje, što «Nioman» budzie zmahacca za samyja vysokija miescy ŭ čempijanacie i, mahčyma, niešta vyjhraje, naprykład, Kubak Biełarusi. Adnak rašeńnie zadačy pa Kubku (a moža, i nie tolki pa im) u apošnija dni ŭskładniłasia. Pryčym zusim nie pa spartovym pryncypie.
Jak stała viadoma «Trybunie», adrazu čatyry hulcy «Niomana» raptam zastalisia biez pracy. Da niadaŭniaha času futbalisty spakojna rychtavalisia da kubkavych matčaŭ, udzielničali ŭ sparynhach. Ale ŭ spravu ŭmiašaŭsia ministar sportu Siarhiej Kavalčuk.
Tydzień tamu ŭ hrodzienski kłub pastupiła kamanda razarvać ci nie zaklučać kantrakty z udzielnikami videa suprać hvałtu, jakoje było zapisana ŭ žniŭni 2020-ha. Usie, chto fihuravaŭ u zapisie, trapili ŭ čorny śpis.
U sioletnim «Niomanie» pad udar trapili bramnik Siarhiej Kurhanski, abaronca Jaŭhien Laško, paŭabaroncy Raman Pasievič i staražył i sapraŭdnaja lehienda «Niomana» Valery Žukoŭski. Kantrakty dziejničali tolki ŭ Žukoŭskaha i Laško.
Čacviorka futbalistaŭ na videa skazała «My suprać hvałtu!», a heta, jak viadoma, siońniašniamu nie da spadoby. Pakarańnie za «kramołu» — zabarona na pracu ŭ biełaruskim futbole, pakul śpiecyjalnaja ideałahičnaja kamisija «Minsportu» nie prymie inšaje rašeńnie.
Pry hetym jašče na pačatku zimy Kavalevič, sam prychilnik Łukašenki, biŭsia za hulcoŭ z čornaha śpisu, ale abaranić zdoleŭ tolki Žukoŭskaha. Nieviadoma čamu, ale Kavalčuk źmianiŭ litaść na hnieŭ, i zaraz pad razdaču patrapiŭ i kapitan hrodziencaŭ. Usie čatyry futbalisty praciahvajuć treniravacca z kamandaj, ale ŭ kubkavym matčy z «Viciebskam» 5 sakavika nie zhulajuć.
Taki stan spraŭ ździŭlaje, kali ŭspomnić, jak časta i kiraŭnictva «Niomana», i hałoŭny trenier śviacilisia ŭ praŭładnych mierapryjemstvach.
Praŭładny list jany daŭno padpisali, aktyŭna kantaktavali ź Juryjem Karajevym — byłym ministram unutranym spraŭ, pad kiraŭnictvam jakoha katavali biełarusaŭ.
18 studzienia hetaha hoda «niepažadanyja» hulcy razam z partniorami staranna prasłuchali lekcyju, na jakoj čarhovy słužka režymu na fonie čyrvona-zialonaj simvoliki raskazvaŭ pra «pravapasłuchmianyja pavodziny i infarmacyjnuju hihijenu».
Kłub papiaredzili, što kali FK usio ž asłuchajecca, zaklučyć kantrakty z hulcami i zajavić ich na matč Kubka, to płan raźvićcia — a heta mahčymaść atrymlivać hrošy z dziaržbiudžetu, jakim rasparadžajucca łukašysty, — «Niomanu» nie padpišuć. Hrodziency dali zrazumieć, što iści suprać nie majuć namieru, i ŭ vyniku litaralna na dniach płan raźvićcia «Niomanu» zacvierdzili.
«Słuck»: prybrali tych, chto ŭdzielničaŭ u praŭładnym mierapryjemstvie
U kłubie z Minskaj vobłaści situacyja jašče bolš cikavaja. Z hetaha kalektyva ŭ čorny śpis taksama patrapili čacviora, i jany zaraz «pakaranyja» — ź imi razarvanyja ci nie zaklučanyja kantrakty da rasparadžeńnia «kamisii».
Razmova pra bramnikaŭ Iłlu Branaŭca i Paŭła Ščarbačeniu (jon znachodzicca ŭ kłubie, ale pra supracu «Słuck» abjavić nie paśpieŭ), a taksama pra abaroncaŭ Jaŭhienija Vialko i Juryja Astravucha. Pry hetym apošni ŭ zapisie videa ŭ 2020-m nie ŭdzielničaŭ. Astravuch naohuł u niepažadanych režymu momantach zaŭvažany nie byŭ, ale, pavodle našaj infarmacyi, patrapiŭ u čorny śpis praz aktyŭnaść adnaho sa svajakoŭ.
Jašče ŭ paniadziełak kamanda spakojna rychtavałasia da kubkavaj sustrečy sa «Słavijaj», nastroj, jak nam raspaviali, u kalektyvie byŭ vydatny — usie čakali startu siezona. Adnak 1 lutaha adbylisia kardynalnyja pieramieny. Jak i ŭ «Nioman», u «Słuck» pastupiła rasparadžeńnie ad dyktatarskaha Minsportu zvolnić «niepažadanych». Pry hetym adznačym, što ŭ Branaŭca, Vialko i Ščarbačeni dziejnych pahadnieńniaŭ z kłubam jašče nie było, a voś Astravuch pierazaklučyŭ kantrakt sa «Słuckam» 7 lutaha. Ciapier pa fakcie ŭsia čacviorka znachodzicca ŭ statusie biespracoŭnych.
Hulcy praciahvajuć treniroŭki z kamandaj, ale pry hetym viedajuć, što ŭ niadzielnym matčy z mazyranami na pole nie vyjduć.
Pra «asablivaje» rasparadžeńnie čynoŭnikaŭ futbalistam paviedamili kiraŭniki kłuba ŭ pryvatnaj hutarcy litaralna paru dzion tamu.
Nie źbieroh hulcoŭ ad pomsty tatalitarnaj sistemy navat ich udzieł u praŭładnych mierapryjemstvach. Nahadajem, što 19 studzienia Vialko, Branaviec i Astravuch u adnoj sa škoł horada praviali «patryjatyčny ŭrok». Futbalisty nibyta «padrychtavali materyjały ab klučavych etapach Vialikaj Ajčynnaj vajny, 85-hoddzi Minskaj vobłaści i dziaržaŭnaj simvolicy» — i niešta raskazvali školnikam, hledziačy ŭ papierki.
«Słuck» abiacaŭ vykłaści videa z mierapryjemstva, ale hetaha nie zrabiŭ — zatoje ŭ pačatku lutaha «Minsportu» paviedamiła, što Astravuch kazaŭ pra pryjemnyja adčuvańni ad «aktyŭnaj pracy hramadskich arhanizacyj» dla taho, kab dzieci «śviata šanavali podźvih našych hierojaŭ».
Prajava ščyraha patryjatyzmu nie pierakanała Kavalčuka — hulcy prynamsi za pieršym matčam sa «Słavijaj» buduć nazirać z boku. Pry hetym, pavodle našaj infarmacyi, pierad «Słuckam» była pastaŭlena ŭmova, što kali kłub nie pasłuchajecca i zaklučyć z futbalistami kantrakty, to sprava moža skončycca vyklučeńniem z čempijanatu.
Što ŭ inšych udzielnikaŭ Kubka?
U čornym śpisie, jak viadoma, prysutničajuć pradstaŭniki i inšych kalektyvaŭ, jakija rychtujucca da kubkavych matčaŭ. «Trybunie» ŭdałosia daviedacca niekalki cikavych detalaŭ ź ich žyćcia.
U BATE, jaki ŭ subotu zhulaje z «Biełšynaj», niepažadanymi ličacca Stanisłaŭ Drahun, Maksim Bardačoŭ, Dźmitryj Biaśśmiertny, Dzianis Ščarbicki i Daniła Niačajeŭ. I, pavodle našaj infarmacyi, dvoje pieršych pa-raniejšamu pad zabaronaj Kavalčuka. Ni ŭ Drahuna, ni ŭ Bardačova niama kantraktu z «žoŭta-sinimi», bo pa ich jašče nie vyrašyła pytańnie «kamisija». Paŭabaronca i abaronca trenirujucca z kamandaj, ale ŭdziełu ŭ pajadynku z babrujčanami nie prymuć.
U «Słavii» i «Šachciory», u jakich u čornym śpisie pa hulcu (Uładzisłaŭ Žuk i Pavieł Zabielin adpaviedna), usio spakojna. Pa našaj infarmacyi, futbalisty padpisali kantrakty i spakojna rychtujucca da kubkavych matčaŭ. Zabielin zusim niadaŭna staŭ uładalnikam Supierkubka, adyhraŭšy ŭvieś matč suprać «Homiela». Nie čapajuć i «Biełšynu», dzie «śpisačnymi hulcami» zjaŭlajucca Artur Słabaševič, Kirył Leanovič i Pavieł Čykida. Mabyć, ich udzieł u niadaŭnim uskładańni viankoŭ i naviedvańni vieterana VAV zhulała svaju rolu.
Usio spakojna ŭ «Viciebsku», jaki rychtujecca da siezona ŭ pieršaj lizie. Tam niama «niepažadanych» futbalistaŭ i trenieraŭ, a kiraŭnik FK nie raz davaŭ zrazumieć, što jon całkam padtrymlivaje režym.
Nu i jašče adzin udzielnik čverćfinału Kubka — «Tarpieda-BiełAZ».
Tam jość peŭnyja źmieny, ale jany zbolšaha nie źviazanyja ź ideałohijaj.
Adzinaje, pa-raniejšamu biez kantraktu znachodzicca Anatol Makaraŭ, jaki ŭ 2020-m vykazaŭsia suprać hvałtu, a ŭ pačatku 2023-ha na videa-kajańni zahavaryŭ pra «ŭpłyŭ destruktyŭnych kanałaŭ, starejšych tavaryšaŭ i vialikuju padtrymku dziaržavy».
Žadańnie dahadzić uładzie pakul nie pryviało da pažadanaha vyniku. Vialikaja vierahodnaść, što suprać «Šachciora» paŭabaronca nie zhulaje. I nie tolki praz adsutnaść pahadnieńnia z kłubam, ale i z pryčyny chvaroby, praz jakuju jon ciapier nie pracuje z kamandaj.
Nie budzie ŭ subotu ŭ zajaŭcy eks-kapitana «Tarpieda-BiełAZ» Andreja Chačaturana. Jon taksama patrapiŭ u śpis niepažadanych i ŭ pačatku hoda byŭ sasłany ŭ dubl «aŭtazavodcaŭ» — praŭda, nie pa ideałahičnych pryčynach. Hałoŭny trenier kamandy Dźmitryj Mołaš daŭ zrazumieć, što na paŭabaroncu bolš nie raźličvaje, tamu Chačaturan i trenirujecca z reziervam, i hulaje za moładź u tavarniakach. Adnak na praŭładnyja mierapryjemstvy (naprykład, uskładańnie viankoŭ) chodzić z asnovaj.
Asobna adznačym, što na dadzieny momant usio supakoiłasia vakoł samoha Mołaša. Jašče niadaŭna paviedamlałasia, što treniera mohuć prybrać z kamandy praz toje, što ŭ 2020-m, pracujučy ŭ «Łijepai», jon mimachodź vykazaŭsia pra padziei na Radzimie. Adnak zaraz, pavodle našaj infarmacyi, usio bolš-mienš sucišyłasia — kouč pracuje z kalektyvam i rychtuje jaho da Kubka.
Kali prymuć rašeńnie pa hulcach?
Biezumoŭna, i kłuby, i sami apalnyja futbalisty čakajuć rašeńnia tak zvanaj «kamisii». Nahadajem, što Kavalčuk u ideałahičnych pytańniach z niadaŭniaha času raicca z paŭabaroncam minskaha «Dynama» Antonam Puciłam.
Dyk voś, spartśmieny čakajuć rašeńnia — mohuć jany zaklučać kantrakty ci nie. Adnak kali «kamisija» źbiarecca, kab niešta vyrašyć, — hetaha ŭ futbolnaj supolnaści nichto nie viedaje. Pa fakcie, kłubam było dadziena ŭkazańnie aficyjna nie supracoŭničać z «niepažadanymi» hulcami i čakać dalejšych rasparadžeńniaŭ, a pastupiać jany nieviadoma kali.
Futbalisty ryzykujuć prapuścić nie tolki pieršyja kubkavyja čverćfinały, ale i matčy ŭ adkaz (11-12 sakavika), a taksama start čempijanatu krainy (17 sakavika). Zrešty, pa rehłamiencie ŭ kłubaŭ navat uviesnu jość čas dazajavić hulcoŭ dla ŭdziełu ŭ čempijanacie. Heta možna zrabić da 1 traŭnia, kali na momant pačatku pieršynstva spartśmieny buduć zjaŭlacca volnymi ahientami.