Беларуская Рада культуры пачала кампанію па адвакацыі беларускага мастацтва за мяжой. Першы — Шагал
Нядаўна Беларуская Рада культуры пад уплывам поспехаў украінцаў у спробах памяняць у замежных музеях і іншых культурных установах трактоўку мастацтва ўкраінскага паходжання як расійскага, заклікала і беларусаў дасылаць аналагічныя прыклады, якія стасуюцца творцаў паходжаннем з Беларусі. Цяпер распачынаецца новы этап.
02.03.2023 / 19:19
У тых рэакцыях, якія БРК атрымала на сваю прапанову, прадказальна пераважаюць згадкі пра Марка Шагала.
Так, подпіс да шагалаўскай карціны «Палюбоўнікі», заўважаны чытачкай у музеі мастацтваў LACMA ў Лос-Анджэлесе, змяшчае згадку пра самога мастака: born in Russia. У апісанні ж — «казачныя дэталі расійскага горада праз акно пакоя ў Віцебску». Гэтыя акрэсленні паўтараюць тэкстоўку Метраполітан-музея, да калекцыі якога «Палюбоўнікі» належаць.
Тых, хто хоча супрацьстаяць падобным падыходам, Беларуская Рада культуры заклікае дасылаць у адпаведныя ўстановы лісты з пратэстамі і прапановамі. Пры гэтым прыкладаецца для спампавання шаблон ліста, каб ад сябе, суполкі ці дыяспары накіраваць яго ў музей з просьбай перагледзець подпіс да твора.
Падаецца і аргументацыя ад мастацтвазнаўцы Сяргея Харэўскага, чаму Марк Шагал — беларускі мастак.