Pamierła Volha Kačan
23 studzienia ŭ aŭstralijskim Piercie na 95-m hodzie žyćcia pamierła ŭkrainska-biełaruskaja emihracyjnaja dziajačka Volha Kačan, paviedamlaje «Novy čas».
01.03.2023 / 18:31
Volha naradziłasia na Vałyni va ŭkrainskaj siamji. Navučałasia ŭ Varšavie, potym u Čechasłavakii. Paśla Druhoj suśvietnaj vajny pierabrałasia ŭ Aŭstrałiju, dzie pabrałasia šlubam z biełarusam Arkadziem Kačanom (1921-1982), viadomym hramadskim i vajskovym dziejačam biełarusaŭ Aŭstralii, ź jakim paznajomiłasia jašče ŭ łahiery dla pieramieščanych asobaŭ u Hiermanii. Praz muža Volha dałučyłasia i da biełaruskaj spravy.
Pracavała pierakładčycaj, vykładčycaj psichałohii ŭ Sidniejskim univiersitecie. Listavałasia na vydatnaj biełaruskaj movie z łondanskaj Skarynaŭkaj, hałoŭnym čynam z ajcom Alaksandram Nadsanam. Słovam i hrašyma padtrymlivała biełaruskuju spravu: achviaravała na Skarynaŭku i na biełaruskija haziety Aŭstralii.
Paśla śmierci muža ŭ 1982 hodzie padtrymlivała suviazi sa Skarynaŭkaj, Biełaruskim instytutam navuki i mastactva. Pisała pra biełarusaŭ Aŭstralii pa-anhielsku, naprykład, u 1988 hodzie ŭ encykłapiedyi The Australian People: an Encyclopedia of the Nation, its People and their Origins (Aŭstralijski narod: encykłapiedyja nacyi, jaje ludziej i ich pachodžańnia).
Taksama Volha Kačan pakinuła ŭspaminy pa-anhielsku pra hady, praviedzienyja ŭ Polščy, Čechasłavakii i Niamieččynie. U siecivie byli raźmieščanyja ŭryŭki ŭspaminaŭ pad nazvaj «Ucioki z «raju»».
Zajmałasia psichalinhvistykaj, mieła akademičnyja publikacyi na temu psichalahičnych asnoŭ, aśpiektaŭ bilinhvizmu. Asablivuju ŭvahu pryciahnuŭ u 80-ja hady minułaha stahoddzia jaje tekst Early Bilingualism: Friend or Foe? («Rańni bilinhvizm: siabar ci vorah?»).
Žyła na piensii ŭ Sidniei da 2021 hoda. U 2021-m pierabrałasia da syna Džordža ŭ Piert, dzie i pamierła. Pachavanaja ŭ Sidniei.