Jakija vitaminy i leki možna dasłać palitviaźniam?
Instrukcyju publikujuć pravaabaroncy «Viasny».
26.02.2023 / 18:54
Ad 1 červienia 2022 hoda ŭ miescach źniavoleńnia pierastali prymać karantynnyja pieradačy, jakija viaźniam možna było pieradavać kožny miesiac u jakaści «dadatkovaj». Źviazana heta sa «stabilizacyjaj situacyi pa zachvorvańni COVID-19».
Padtrymlivać viaźniaŭ vitaminami i lekami možna praz «miedycynskuju banderol». Takuju banderol treba padpisać «z miedykamientami». Dasyłać jaje možna tolki tym viaźniam, prysud jakich nie ŭstupiŭ u zakonnuju siłu.
Śpis nieabchodnych i dazvolenych lekaŭ, jakija možna pieradać viaźniam abo dasłać poštaj:
— Lubyja vitaminy (taksama «D3-kaps» i Amieha-3), možna navat u šyplivych tabletkach;
— leki pry chraničnych zachvorvańniach, kali jany jość;
— abiazbolnyja, haračkapanižalnyja, supraćzapalenčyja, «Acykłavir maź»;
— zaspakajalnyja: «Fienibut», «Naafien», «Afabazoł», «Valarjanka 600 mh» i inšyja;
— śviečki i krem «Relif»;
— praciahły kurs «Terafleksa» ad bolu ŭ sustavach;
— hijałuronavyja kropli dla vačej, kab uvilhatniać ich;
— tabletki ad horła, kašlu, sprej dla nosa z eŭkaliptam, «ACC»;
— «Śmiekta», «Almahiel», «Amiez» i inšyja leki ad bolu ŭ straŭniku;
— leki pry kišačnych rasstrojstvach;
— lejkapłastyr;
— «Dekspantenoł»;
— inhalatary, kali ŭ čałavieka astma.