Valfovič pra narodnaje apałčeńnie: Im budzie vydadziena strałkovaja zbroja, jakaja budzie zachoŭvacca pry ich
Staršynia Rady biaśpieki Alaksandr Valfovič u efiry «Biełaruś 1» raskazaŭ, jak, na dumku kiraŭnictva łukašenkaŭskaha režymu, maje budavacca narodnaje apałčeńnie, prajekt ab jakim na hetym tydni abmiarkoŭvali z udziełam Łukašenki.
26.02.2023 / 08:57
Alaksandr Valfovič
Pavodle Valfoviča, farmiravać narodnaje apałčeńnie buduć miascovyja orhany ŭłady, a kiravać jaho atradami — addzialeńni ŭnutranych spraŭ. Zadačy apałčeńnia ŭ vypadku vajennaha stanovišča — «abarona paradku, baraćba z bandytyzmam i maradziorstvam, dyviersijna-raźviedvalnymi hrupami».
Možna mierkavać, što ŭ apałčeńnie, kali da jahonaha farmavańnia sprava sapraŭdy dojdzie, buduć nabirać samych pravieranych prychilnikaŭ režymu, bo im miarkujecca akazvać nadta vialiki davier:
«Im budzie vydadziena strałkovaja zbroja. Zbroja budzie zachoŭvacca pry ich. Žyć jany buduć i charčavacca doma», — skazaŭ Valfovič.
Prymać rašeńnie ab tym, kaho brać u narodnaje apałčeńnie, buduć kiraŭniki miascovaj ułady: staršyni abłasnych, rajonnych vykankamaŭ i hetak dalej. U ich budzie «šyrokaje pole mahčymaściaŭ» u pryniaćci rašeńnia ab tym, ci možna vydavać čałavieku zbroju.
«Buduć vyvučanyja katehoryi hramadzian», — abiacaje kiraŭnik łukašenkaŭskaj Rady biaśpieki.
Pavodle jaho, u hetaje apałčeńnie buduć brać i žančyn, kali jany buduć adpaviadać patrabavańniam.
Zvalniacca z pracy dla niasieńnia słužby ŭ apałčeńni nie budzie patrebna, ale pa rašeńni miascovaha kiraŭnika jany buduć na niejki čas vyzvalacca ad pracy dla vykanańnia abaviazkaŭ u družynach. Zarobak pry hetym budzie zachoŭvacca.
Pry hetym słužba ŭ apałčeńni nie vyzvalaje hramadzianina ad vajskovaj słužby: pry nieabchodnaści tyja, chto da jaje prydatny, mohuć być mabilizavany i ŭ vojska.