Novaja ŭstanoŭka rasijskaj prapahandy: mužčyn zavablivajuć na front, abiacajučy zrabić «novaj elitaj». I ŭsio padmacoŭvajecca Dastajeŭskim
Tekst, jaki prahnazuje «surjoznyja źmieny ŭ sacyjalna-palityčnym łandšafcie Rasii», byŭ apublikavany ŭ tym raździele sajta aficyjnaha rasijskaha ahienctva RIA «Novosti», dzie źmiaščajucca ŭstanovačnyja materyjały.
21.02.2023 / 22:46
Rasijskija sałdaty čytajuć listy, napisanyja školnikami ŭ znak padtrymki ŭ nienazvanym miescy na ŭschodzie Ukrainy, aŭtorak, 14 lutaha 2023 h. (AP Photo/Alaksiej Alaksandraŭ)
Na dumku rasijskaha prapahandysta, ukaz prezidenta Rasii ab ilhotach siemjam paciarpiełych ci zahinuŭšych udzielnikaŭ tak zvanaj śpiecyjalnaj vajennaj apieracyi va Ukrainie, moža pryvieści da surjoznych źmienaŭ u sacyjalna-palityčnym łandšafcie Rasii.
Ukaz uvioŭ «śpiecyjalnuju kvotu pryjomu» na navučańnie ŭ VNU ŭ pamiery 10% pa kožnym nakirunku ci śpiecyjalnaści. Biez ekzamienaŭ (za vyklučeńniem dadatkovych ispytaŭ tvorčaj i (ci) prafiesijnaj nakiravanaści) buduć prymacca dzieci zahinułych, paranienych ci atrymaŭšych zachvorvańni padčas bajavych dziejańniaŭ. Dzieci, čyje baćki (maci ci baćka) vajuiuć ci advajavali i zastalisia žyvymi i zdarovymi, buduć iści pa asobnym ilhotnym konkursie.
Hetaja lhota — adna z šerahu raznastajnych mier padtrymki ŭdzielnikaŭ bajavych dziejańniaŭ i ich siemjaŭ. Siarod ich značnyja hrašovyja vypłaty, padatkovyja ilhoty, sanatornaje absłuhoŭvańnie, vydzialeńnie ziamielnych nadziełaŭ. Kožny rehijon Rasii maje svaje pieraliki takich mier.
A ciapier prasočym, jak prapahandyst sprabuje z hetaj miery vyvieści šmatabiacalnyja pierśpiektyvy dla ŭdzielnikaŭ vajny.
Z hetaj metaj jon pravodzić paraleli z Rymskaj impieryjaj. Tym bolš, što na dumku Strelnikava, pakrokavaja instrukcyja dla Rasii na najbližejšyja hady zaklučajecca ŭ daŭno viadomym vykazvańni «Maskva — treci Rym, a čacviortamu nie być».
Padtrymka hramadzian-voinaŭ była ŭsłaścivaja Staražytnamu Rymu. Mienavita jany mieli prava hołasu i mahli pryznačać impieratara, atrymlivali značnyja hrašovyja vypłaty, piensiju i šmatlikija ilhoty. Siemji lehijanieraŭ taksama karystalisia ilhotami.
Słužba ŭ vojsku Ryma była samaj karotkaj darohaj dla niehramadzian z dalokich pravincyj da atrymańnia hramadzianstva, statusu i bahaćcia.
Aŭtar padkreślivaje, što zajmać dziaržaŭnyja pasady ŭ Rymie mahli tolki tyja, chto słužyŭ u vojsku ci prymaŭ udzieł u vojnach. Jon ža akcentuje ŭvahu na tym, što ŭchileńnie ad vykanańnia voinskaha doŭhu karałasia až da prodažu ŭ rabstva.
Takim čynam, hetaja palityka ŭ Staražytnym Rymie pryviała da taho, što lehijaniery pieratvarylisia ŭ bahatuju i pryvilejavanuju sacyjalnuju hrupu. Jana akazvała surjoznaje ŭździeiańnie na palityku dziaržavy. A sam Rym pieratvaryŭsia ŭ samuju mahutnuju dziaržavu svajho času, jakaja abaraniała narody i pašyrała ŭpłyŭ pa ŭsim śviecie.
A heta tak supadaje z sfarmulavanaj prapahandystam histaryčnaj usialenskaj i suśvietnaj misijaj i losam Rasii — być vyzvalicielem i abaroncam pryhniečanych i vajennaj siłaj padtrymlivać na ziamli mir i spraviadlivaść.
Svaje dumki Strelnikaŭ padmacoŭvaje cytatami z Fiodara Dastajeŭskaha ab tym, što ruski narod choča roskvitu nie praz padaŭleńnie asoby i čužych nacyjanalnaściej, a imkniecca da jaho praz brackaje ŭsiejadnańnie. Pryznačeńnie ruskaha čałavieka ŭsiaśvietnaje. Rasija žyvie nie dziela siabie, a dziela idei. Naš los heta — i los śvietu.
Nie zabyvajecca jon i pryvieści słovy fiłosafa Mikałaja Biardziajeva pra Rasiju jak vyzvalicielnicu inšych narodaŭ, adziny apłot sapraŭdnaha chryściianstva, miesijanskuju krainu.
U tym ža raździele sajta, dzie apublikavany artykuł pra «novuju elitu», 26 lutaha minułaha hoda rasijskaje dziaržaŭnaje ahienctva apublikavała artykuł, u jakim tryumfalna paviedamlała pra «nadychod novaha śvietu».
«Novyj mir roždajetsia na našich hłazach. Vojennaja opieraciia Rossii na Ukrainie otkryła novuju epochu — pričiem srazu v triech iźmierieniiach. Rossiia vosstanavłivajet svoje jedinstvo — trahiediia 1991 hoda, etoj strašnoj katastrofy našiej istorii, jeje protivojestiestviennyj vyvich, prieodoleny. Da, bolšoj cienoj, no Ukrainy kak anti-Rossii bolšie nie budiet. Rossiia vosstanavłivajet svoju istoričieskuju połnotu, sobiraja russkij mir, russkij narod vmiestie — vo vsiej jeho sovokupnosti viełikorossov, biełorusov i małorossov», — pafasna havaryłasia ŭ artykule.
«Ukraina viernułaś k Rossii. Eto nie značit, čto budiet łikvidirovana jeje hosudarstviennost, no ona budiet pierieustrojena, pierieučrieždiena i vozvraŝiena v svoje jestiestviennoje sostojaniie časti russkoho mira. V lubom słučaje — zavieršajetsia pieriod raskoła russkoho naroda», — śćviardžałasia ŭ artykule, jaki byŭ padrychtavany, imavierna, z raźlikam, što Ukraina kapituluje.
Praz dva dni paśla taho hety artykuł byŭ vydaleny, bo stała jasna, što płan Pucina i Łukašenki pravaliŭsia. Ale jaho kopija zastałasia ŭ veb-archivie, možacie atrymać asałodu.