Biełarus razburyŭ kaplicu ŭ aeraporcie Hdańska
Hdańskija palicejskija aryštavali 27-hadovaha hramadzianina Biełarusi, jaki źniščyŭ abstalavańnie ŭ kaplicy aeraporta. Biełarusa taksama abvinavačvajuć u abrazie relihijnych pačućciaŭ, piša Most na padstavie paviedamleńniaŭ polskaj presy.
17.02.2023 / 18:58
Pavodle najaŭnaj infarmacyi, biełarus zajšoŭ u kaplicu, pačaŭ tam pierakulvać i kidać pradmiety, vyryvać staronki ź Biblii. U vyniku byli paškodžanyja papskaja kafiedra, skrutak z vyjavaj Jana Paŭła II, draŭlany ałtar i padłoha, padstaŭka dla ŭlotak. Škodu acanili ŭ 35 tysiač złotych.
Spačatku mužčynu zatrymali supracoŭniki biaśpieki aeraporta, a zatym jany pieradali jaho palicejskim. Test na ćviarozaść pakazaŭ, što ŭ arhaniźmie mužčyny było 1,5 pramile ałkaholu. Noč mužčyna pravioŭ u addzialeńni palicyi.
Za paškodžańnie majomaści biełarusu pahražaje da piaci hadoŭ pazbaŭleńnia voli, a za abrazu relihijnych pačućciaŭ — da dvuch hadoŭ. Adnak pakarańnie moža być i bolšaje, bo sprava nosić chulihanski charaktar.