Украінская Генпракуратура арыштавала 170 вагонаў з беларускімі і расійскімі ўгнаеннямі
Генпракуратура Украіны наклала арышт на 170 вагонаў з угнаеннямі «Беларуськалія» і «Уралкалія». Іх кошт — больш за 2,7 млн даляраў.
06.02.2023 / 18:30
«Па інфармацыі следства, чыгуначныя кантэйнеры з угнаеннямі прыбылі ва Украіну яшчэ да пачатку поўнамаштабнага ўварвання. Яны знаходзіліся ў рэжыме «транзіт» у Мікалаеве на тэрыторыі марскога спецыялізаванага порта», — заявілі ў офісе генпракурора Украіны.
Сцвярджаецца, што беларускі і расійскі калій перавозіўся «ў трэція краіны для продажу і атрымання мільённых прыбыткаў», пры гэтым частка выручкі «ў выглядзе падаткаў пайшла б на фінансаванне вайны Расіі супраць Украіны».
Арыштаваная маёмасць будзе перададзеная агенцтву па пошуку і менеджменце актываў. Пачатае дасудовае расследаванне па артыкуле аб ухіленні ад выплаты падаткаў.
Раней, 28 студзеня, Украіна ўвяла санкцыі супраць «Беларуськалія» і яшчэ 22 беларускіх кампаній.