ISW: Расійскае Мінабароны плануе афіцыйна інтэграваць войскі з самаабвешчаных ЛНР і ДНР у склад сваіх узброеных сіл
У зводцы Амерыканскага інстытута вывучэння вайны (ISW) 4 лютага аналізуюцца паведамленні пра страты Расіі ў вайне і спробы Масквы іх папоўніць.
04.02.2023 / 09:15
Фота AP
Ваенныя эксперты звяртаюць увагу на тое, што афіцыйныя асобы ў ЗША і іншых заходніх краінах лічаць, што колькасць забітых і параненых расійскіх вайскоўцаў ва Украіне набліжаецца да 200 тысяч чалавек. Вялікая колькасць расійскіх страт у вайне ва Украіне працягвае аказваць згубны ўплыў на баяздольнасць расійскіх узброеных сіл і можа заахвоціць расійскіх афіцыйных асоб правесці другую хвалю мабілізацыі, паколькі вайскоўцы рыхтуюцца да будучых наступаў на Украіне, гаворыцца ў зводцы ISW.
Акрамя таго, расійскае мінабароны плануе афіцыйна інтэграваць войскі з самаабвешчаных ЛНР і ДНР у склад расійскіх узброеных сіл, пішуць аналітыкі са спасылкай на ваенных блогераў. У прыватнасці, ваенкар і рэпарцёр ВГТРК Аляксандр Сладкоў напісаў на днях, што Мінабароны Расіі трансфармуе злучэнні самаабвешчаных ЛНР і ДНР у рэгулярныя «брыгады, батальёны і палкі». Усё гэта можа адбывацца дзеля ініцыятывы міністра абароны Сяргея Шайгу па павелічэнні колькасці расійскіх вайскоўцаў і стварэнні новых манеўраных дывізій, мяркуюць ваенныя аналітыкі.
Тым часам расійскія акупацыйныя ўлады працягваюць распаўсюджваць сцвярджэнні аб тым, што ў складзе расійскіх добраахвотніцкіх фармаванняў служаць замежныя добраахвотнікі — гэта дазваляе прадстаўляць Расію менш ізаляванай на міжнародным узроўні, гаворыцца ў зводцы ISW. Напрыклад, прызначаны Масквой губернатар акупаванай часткі Запарожскай вобласці Яўген Баліцкі раней заяўляў, што ў так званым «добраахвотніцкім атрадзе Запарожскай вобласці» ёсць грамадзяне Сербіі і Турцыі, аднак «ISW не выявіў ніякіх пацвярджэнняў гэтага».
Ваенныя эксперты мяркуюць, што падобныя заявы могуць таксама выкарыстоўвацца для таго, каб даць зразумець канкрэтным замежным краінам, што ў іх ёсць прарасійскія выбаршчыкі.