Biełaruski vytvorca jajek spyniaje pastaŭki ŭ Rasiju
Biełaruski vytvorca kurynych jajek «Firma AVS» paviedamiŭ rasijskim kontrahientam ab prypynieńni pastavak. Kopija adpaviednaha lista jość u RTVI. U im ukazvajecca, što rašeńnie źviazana ź niedachopam pradukcyi i nieabchodnaściu ŭ pieršuju čarhu zabiaśpiečyć unutrany rynak.
03.02.2023 / 15:29
Biełaruś užo ŭvodziła zabaronu na ekspart stałovych jajek, miasa kurycy i małočnaj pradukcyi dla siami bujnych kampanij — «Firma AVS» u ich lik nie ŭvachodziła.
List rasijskim rytejleram «Firma AVS» razasłała 20 studzienia, jaho sapraŭdnaść paćvierdziŭ adzin z vytvorcaŭ jajek u Rasii, a taksama pradstaŭnik praduktovaj sietki. U samoj «Firmie AVS» kamientaroŭ nie dali.
Pa ŭłasnych danych, «Firma AVS» vypuskaje jajki «Vialikija», «10 bajarskich», «Žaŭtok ź vioski» i inšyja. Akramia taho, kampanija zajmajecca vytvorčaściu sokaŭ i niektaraŭ pad markaj «AVS», a taksama adnajmiennych kietčupaŭ i majanezu, chrenu i harčycy, piure, kansiervaŭ i vareńnia.
Pavodle źviestak biełaruskich ŚMI, kampaniju ŭ 1995 hodzie zasnavaŭ uradženiec Piermskaj vobłaści Ivan Majsiejeŭ. Ciapier firma na parytetnych pačatkach naležyć jamu i Taćcianie Majsiejevaj. U 2016 hodzie Ivan Majsiejeŭ sprabavaŭ znajści stratehičnaha inviestara, razhladajučy mahčymaść prodažu da 100% kampanii.
U kastryčniku minułaha hoda Biełaruś užo ŭvodziła zabaronu na ekspart stałovych jajek, a taksama miasa kurycy i małočnaj pradukcyi. Tady abmiežavańni raspaŭsiudžvalisia na siem kampanij — «Siervaluks Ahra», Viciebskuju brojlernuju ptuškafabryku, ptuškafabryku «Družba», Baranavickuju ptuškafabryku, 1-ju Minskuju ptuškafabryku, a taksama Rahačoŭski i Lepielski kambinaty.
Ci była zabarona źniata, ci pad abmiežavańni trapili novyja kampanii — nieviadoma. U Ministerstvie sielskaj haspadarki i charčavańnia Biełarusi, a taksama va ŭradzie na zapyty nie adkazali. Nie dali kamientaroŭ i ŭ bujnych rasijskich handlovych sietkach.