Netflix paprasili dadać biełaruskija subcitry. Što jany adkazali?
Biełarus źviarnuŭsia ŭ Netflix z prapanovaj dadać biełaruskuju movu na servis. Pra toje, što atrymałasia, jon raskazvaŭ u tvitary.
24.01.2023 / 15:47
Skrynšot netflix.com
Chłopiec napisaŭ u słužbu padtrymki polskaha ofisa Netflix. Źviarnuŭ uvahu na toje, što, naprykład, biełaruskuju movu viedaje bolš ludziej, čym češskuju, ale češskaja na servisie jość.
Zapyt na pierakład interfejsu na biełaruskuju movu słužba padtrymki paabiacała pieradać kiraŭnictvu.
A voś nakont subcitraŭ prapanavali bolš kankretny miechanizm dziejańnia.
Napisali, što možna prapanavać kankretnyja filmy ci sieryjały, jakija treba pierakłaści, praz śpiecyjalnuju formu na staroncy. Dla hetaha treba mieć ulikovy zapis.
Forma, jakuju prapanavali zapoŭnić
U kamientaryjach abmiarkoŭvajuć, što kali z zapytam na biełaruskija subcitry źvierniecca bolš ludziej, to hetaja opcyja moža stać realnaj.