ZŠA hatovyja niadoraha pastaŭlać haz u Jeŭropu pry ŭmovie doŭhaterminovych kantraktaŭ
Dla zabieśpiačeńnia pastavak pryrodnaha hazu ŭ Jeŭropu pa bolš nizkaj canie, čym ciapier, nieabchodna zaklučyć doŭhaterminovyja kantrakty, zajaviŭ kiraŭnik EQT, najbujniejšaha vytvorcy hazu ŭ ZŠA, Tobi Rajs. Pra heta jon zajaviŭ na pres-kanfierencyi ŭ Abu-Dabi.
15.01.2023 / 22:33
Fota ilustracyjnaje
«My možam dastavić haz da paroha Jeŭropy pa canie 12 dalaraŭ za MMBtu [kala 380 dalaraŭ za tys. kub. m.], i heta budzie aznačać canu hazu ŭ ZŠA ŭ 4 dalary za MMBtu», — zajaviŭ Rajs.
Ciapierašniaja cana składaje 20 dalaraŭ za MMBtu.
Pa słovach kiraŭnika EQT, ZŠA mohuć pavialičyć pastaŭki SPH u Jeŭropu dla zamieny rasijskaha hazu. Patencyjał rostu ekspartu ZPH z ZŠA — 500 młrd kub. m u hod u paraŭnańni ź ciapierašnimi 100 młrd kub. m, adnak dla hetaha patrebnyja buduć inviestycyi ŭ adpaviednuju infrastrukturu.
«U nas jość haz, pytańnie ŭ tym, adkul jon pojdzie i jak dabiarecca da rehijonaŭ, u jakija patrebnyja dabracca»,— rastłumačyŭ Tobi Rajs.
U śniežni ceny na zvadkavany pryrodny haz u Paŭnočna-Zachodniaj Jeŭropie dabralisia da maksimumu za dva miesiacy ŭ 33,22 dalara za MMBtu. Z materyjałaŭ Jeŭrakamisii vynikaje, što ź lipienia pa vierasień na impart hazu ES vydatkavaŭ kala 101 młrd jeŭra, što stała rekordnym pakazčykam za apošniaje dziesiacihoddzie. Vydatki za anałahičny pieryjad 2021 hoda składali 29 młrd jeŭra.