З аўкцыёну прадаюць карціны нямецкага мастака з краявідамі Мінска 1942 года
На анлайн-аўкцыёне прадаюць пяць карцін нямецкага жывапісца Эдуарда Вінклера, на якіх намаляваны зімовыя пейзажы Мінска 1942 года. Пра гэта расказаў тэлеканал АНТ.
09.01.2023 / 00:15
Мастак Вінклер апынуўся на Усходнім фронце падчас Другой сусветнай вайны. На пяці ягоных работах адлюстраваны вядомыя месцы — Верхні горад са Свята-Духавым саборам і касцёлам Панны Марыі, а таксама цяпер ужо не існуючая галоўная мячэць. Сярод лотаў таксама беларускі вясковы пейзаж.
Па карцінах Вінклера не скажаш, што напісаныя яны ў час вайны. Хоць у 1942 годзе Мінск ужо быў значна разбураны, на творах мастака гэта не адлюстравалася.
Сам Эдуард Вінклер нарадзіўся ў Санкт-Пецярбургу, скончыў прэстыжную Мюнхенскую акадэмію выяўленчага мастацтва. З 1943 па 1945 гады ён быў удзельнікам антыфашысцкага падполля ў Германіі.