Нямецкія палітыкі прапануюць абмеркаваць пастаўку танкаў Украіне
Міністр эканомікі Германіі Роберт Хабек заявіў, што было б правільна абмеркаваць з саюзнікамі пытанне пастаўкі танкаў Украіне і па выніках гэтых абмеркаванняў прыняць рашэнне.
05.01.2023 / 16:30
БМП «Мардар»
Раней кіраўнік абароннага камітэта нямецкага Бундэстага Мары-Агнес Штрак-Цымерман у інтэрв'ю газеце Süddeutsche Zeitung заклікала ўрад перагледзець сваю пазіцыю адносна паставак Украіне танкаў.
У якасці прыкладу Штрак-Цымерман указала на пастанову Францыі адправіць ва Украіну танкі AMX-10 RC, абсталяваныя гарматай калібрам 105 мм.
«Нашы заходнія партнёры зноў першымі робяць крок, якога яны маглі чакаць ад нас», — заявіла кіраўнік абароннага камітэта Бундэстага.
Яна прапанавала пачаць пастаўкі Кіеву баявых машын пяхоты «Мардар» і неадкладна арганізаваць навучанне іх эксплуатацыі.
Мары-Агнес Штрак-Цымерман адзначыла, што «Мардары» ёсць у дастатковай колькасці на складах Бундэсвера, таксама як і боепрыпасы да іх.
Украінскія ўлады неаднаразова выказвалі сваю незадаволенасць нежаданнем краін Захаду пастаўляць украінскім Узброеным сілам танкі, якія з'яўляюцца наступальным відам узбраенняў.