U Izraili skončyli raskopki hrabnicy «pavituchi Chrysta»
Izrailskija archieołahi zaviaršyli raskopki piačory Sałamiei — hrabnicy prykładna za 50 kiłamietraŭ ad Iierusalima. Miarkujecca, što ŭ joj była pachavanaja pavitucha, jakaja prysutničała pry naradžeńni Isusa Chrysta.
25.12.2022 / 23:58
Tak vyhladaje miesca raskopak. Hrabnicu 40 hadoŭ tamu znajšli maradziory, archieałahičnyja raboty ŭ joj pačalisia ŭ 1984 hodzie
U piačory Sałamiei dźvie tysiačy hadoŭ tamu chavali pradstaŭnikoŭ znatnaj jaŭrejskaj siamji. Pachavalnia składajecca z asobnych kamier z pachavalnymi nišami. Ścieny i padłoha ŭpryhožanyja raźboj, a ŭ piaredniaj častcy arhanizavany dvor płoščaj 350 kvadratnych mietraŭ.
U piačory znajšli ślady prysutnaści ludziej rańnievizantyjskaha pieryjadu — prykładna V stahoddzia. U mahilnym sklepie zastalisia sotni hlinianych alejnych lampaŭ pilihrymaŭ i nadpisy viernikaŭ na ścienach. Hrabnicu naviedvali pałomniki ź Vizantyi, Siryi, Kapadokii.
Lampy pałomnikaŭ i hrecki nadpis, nadrapany na ścianie pachavalni
Miarkujučy pa nadpisach, chryścijanie ličyli piačoru miescam pachavańnia Sałamiei — pavituchi, jakaja prymała rody ŭ Dzievy Maryi. Jana namalavanaja na mnohich pravasłaŭnych abrazach. Ale prablema ŭ tym, što historyja pra Sałamieju raskazanaja ŭ Jevanhielli ad Jakuba, a jahonaja sapraŭdnaść vyklikaje sumnievy.
Ci sapraŭdy isnavała pavitucha Sałamieja i ci była jana pachavanaja ŭ hetaj piačory, nieviadoma. Archieołahi ličać, što hetaje žanočaje imia mahło być vysiečana na adnoj z pachavalnych kamiennych skryń. Chtości ź pieršych chryścijan moh jaho ŭbačyć i paviedamić inšym, što znajšoŭ mahiłu pavituchi Chrysta. Hetaha było b dastatkova, kab u pachavalniu nakiravalisia tysiačy pałomnikaŭ.