З Расіі ў Беларусь прыбыў яшчэ адзін вайсковы эшалон з «Ураламі»
Аб прыбыцці ў Беларусь чарговага расійскага эшалона з новымі грузавікамі «Урал» на вагонах-платформах паведаміў тэлеграм-канал супольнасці беларускіх чыгуначнікаў.
18.12.2022 / 18:25
Скрыншот з відэа супольнасці беларускіх чыгуначнікаў
Паводле звестак канала, эшалон быў адпраўлены з расійскай станцыі Місяш у Чалябінскай вобласці на беларускую станцыю Асіповічы-I.
З Расіі эшалон з пагружанай на вагоны-платформы колавай тэхнікай (50 аўтамабіляў «Урал») адправіўся 11 снежня і прыбыў на станцыю прызначэння 16 снежня каля гадзіны ночы. Паводле інфармацыі канала, падрыхтоўка да выгрузкі вайсковай тэхнікі пачалася 16 снежня ў 04:30.
Перад гэтым 11 снежня на станцыю Палонка ў Баранавіцкім раёне з той жа станцыі Місяш прыбыў вайсковы эшалон з мінімум 30 адзінкамі новых грузавікоў «Урал».