Стала вядома, колькі чалавек затрымалі падчас аблавы ў Браславе
Падчас аблавы, якую зладзіў ГУБАЗіК 7 снежня ў Браславе, было затрымана каля 15 чалавек.
12.12.2022 / 00:01
Пра гэта ў сацсетках паведаміў адзін з мясцовых жыхароў.
Большасць былі затрыманыя па артыкуле 19.11 Кодэкса аб адміністрацыйных правапарушэннях — распаўсюд экстрэмісцкіх матэрыялаў.
Па гэтым артыкуле людзей судзяць за рэпост у сацыяльных сетках інфармацыі з нелукашэнкаўскіх крыніц.
У прыватнасці, аднаго з затрыманых забралі за тое, што ў 2020 годзе перапосціў навіну з незалежнага тэлеграм-канала.
Некаторых абвінавачвалі ў парушэнні парадку правядзення масавых мерапрыемстваў (артыкул 24.23).
Па інфармацыі «Нашай Нівы», затрымліваў людзей віцебскі ГУБАЗіК пры падтрымцы полацкага АМАПу. Нагодай для вобшукаў і затрыманняў стала падпіска на тэлеграм-чат «Браслаў для жыцця», а таксама рэпосты публікацый «Нашай Нівы» 2020 года.
У аддзяленне міліцыі дастаўлялі ў кайданках.