Крымінальную справу завялі на твітарца
Раней мы пісалі пра маладога хлопца, якога асудзілі на «суткі» за тое, што ён «кпіў з расійскіх сілавікоў». Стала вядома, што цяпер яго вырашылі пакараць «крыміналкай».
09.12.2022 / 17:25
Фота: сацсеткі
«Наша Ніва» высветліла імя рэпрэсаванага. Максіму Аўчарэнку 24 гады і ён з Мар'інай Горкі. Як мы пісалі ў нашым мінулым артыкуле, хлопец у 2019 годзе паступіў на гістфак Беларускага дзяржаўнага педагагічнага ўніверсітэта, але быў адлічаны з трэцяга курса (па звестках аднакурснікаў, не па палітычных матывах).
ГУБАЗіКаўцы тады абвінацілі яго ў тым, што ён «кпіў з расійскіх сілавікоў» і «абразіў Лукашэнку» ў сваім блогу Укантакце. Тады яны хлусліва паведамілі, што супраць яго заведзеная крымінальная справа.
Праз паўтара месяцы пасля гэтага ў ягоным твітары з'явіўся допіс пра тое, што ён выйшаў з-за кратаў.
У канале сілавікоў паведамляецца, што супраць хлопца цяпер заведзеная крымінальная справа за «дэманстрацыю нацысцкай сімволікі» па арт. 341-1 КК Беларусі. На відэа сілавікоў дэманструюцца старыя допісы — у асноўным з беларускай і ўкраінскай сімволікай — і нават не ясна: ці была ў хлопца магчымасць іх выдаліць, ці ён быў затрыманы адразу пасля выхаду з-за кратаў.