«Alena, dzie naša Mivina?». U pieršyja dni vajny Zialenski jeŭ makaronu chutkaha pryhatavańnia. Ukrainskija sacsietki kpiać
Va ŭkrainskim siehmiencie sacyjalnych sietak žyva abmiarkoŭvajuć zajavu pres-sakratara prezidenta Ukrainy Siarhieja Nikifarava, jaki raspavioŭ pra askietyčnyja padrabiaznaści žyćcia kamandy Uładzimira Zialenskaha ŭ pieršyja dni rasijskaha ŭvarvańnia va Ukrainu, piša «Bi-bi-si».
07.12.2022 / 21:24
Pres-sakratar raspavioŭ, što jamu, jak i astatnim, daviałosia pierajechać žyć na pracu i ŭmovy tam byli nie najlepšymi.
«Askietyčnyja ŭmovy, ale samaje nieabchodnaje było: duš — na kalidory, maleńkija pakojčyki ź nizkimi stolami. Usio takoje — ź minułaha, adnačasova čyścieńka i akuratna. Mietałapłastykavyja dźviery i pryhožyja śviatłodyjodnyja lampy nadavali sučasny vyhlad. Nas tam było niamała. Moj pakoj byŭ praz dvoje dźviarej ad prezidenta», — raspavioŭ Nikifaraŭ.
Charčavańnie, pa jaho słovach, u pieršyja dni taksama «było nie vielmi jakasnym».
«Razvodzili «Mivinu» navat nie haračaj, a ciopłaj vadoj, z-za hetaha jana jak treba nie razmakała. Ale heta litaralna pieršyja dni, potym pastupova ź ježaj situacyja palepšyłasia», — zajaviŭ Nikifraŭ.
«Mivina» — handlovaja marka makarony chutkaha pryhatavańnia, jakaja zavajavała na ŭkrainskim rynku absalutnaje lidarstva. Jana viadomaja jak tannaja, chutkaja i prostaja ŭ hatavańni — suchuju łokšynu dastatkova zalić kipieniem i pakinuć na niekalki chvilin.
«Mivinu» asacyjuiuć z žyćciom u pachodnych umovach i hałodnymi i biednymi časami ŭ 90-ja.
Pradukt zapuściŭ na ŭkrainskim rynku ŭ 1995 hodzie ŭ Charkavie mihrant z Vjetnama Fam Niat Vionh. Jon zarabiŭ na joj kapitał i paśla staŭ pieršym miljarderam u siabie na radzimie i samym bahatym čałaviekam Vjetnama.
Z 2010 hoda jaho kampaniju «Technakom», jakaja zajmałasia vytvorčaściu «Miviny», vykupiła hrupa Nestlé.
«Nie žyćcio, a sucelny bol»
Zajavy Nikifarava spravakavali cełuju chvalu žartaŭ. Karystalniki ździŭlajucca, čamu ŭ ofisie prezidenta nie pakłapacilisia pra zapasy bolš pažyŭnaj ježy, i nie mohuć zrazumieć, čamu na Bankavaj nie było navat kipieniu, kab zaparyć łokšynu jak maje być.
«Dobra, što Juzika nie źjeli», — iranizuje karystalnik Śviatłana Kavalčuk, majučy na ŭvazie daŭniaha kalehu Zialenskaha pa humarystyčnych vystupach Juryja Karaŭčankava, viadomaha pa sceničnaj mianušcy «Juzik».
«To śniadankaŭ nie hatujuć, to «Mivina» nie razmokła, heta nie žyćcio, a sucelny bol u kijeŭskich chłopcaŭ, nie toje, što ŭ dziaŭčat USU dzieści na Danbasie», — žartuje karystalnica Darja Andrusienka-Jakaciuk, apublikavaŭšy ŭłasnaje fota z buterbrodam z čyrvonaj ikroj.
U apazicyi ŭzialisia žartavać, što haścinna b nakarmili prezidenckuju kamandu, tamu što, maŭlaŭ, u pieršyja dni vajny ŭ ich u štabie palavaja kuchnia pracavała značna lepš.
«Atrymlivajecca, što ŭ AP sotni supracoŭnikaŭ, a pakłapacicca pra prezidenta, na jakim siońnia kałasalnaja nahruzka, niama kamu, — adznačyła ŭ fejsbuku sustaršynia frakcyi «Jeŭrapiejskaja salidarnaść» Iryna Hieraščanka. — My, darečy, ščyra prapanoŭvali ŭładam ruku dapamohi ź pieršaha dnia vajny. Kali b viedali pra «Mivinu» — arhanizavali b padvoz haračych abiedaŭ u Ofis».
Asobnyja karystalniki miarkujuć, što pres-sakratar prezidenta moh być nie da kanca ščyrym u intervju i trochi pierabolšyŭ askietyčnaść vajennych budniaŭ u AP.
«Hetaja «razbaŭlenaja mivina» — užo ciapier asablivy simvał zeŭłady i novaj łokšyny na vušach ukraincaŭ i ŭsiaho śvietu», — aburajecca karystalnik Hoša Štern.