Нецвярозы гамяльчук вырашыў пагрэць ногі ля Вечнага агню і трапіў у бальніцу
Нецвярозы жыхар Гомеля днём 6 снежня трапіў у бальніцу з моцнымі апёкамі. Пра гэта паведамляе МНС Беларусі. Абставіны няшчаснага выпадку з ім былі незвычайныя.
07.12.2022 / 18:59
Фота ілюстрацыйнае
У ходзе разбіральніцтва высветлілася, што 36-гадовы жыхар Гомеля каля 11-й гадзіны дня вырашыў пагрэцца. Ён падышоў да Вечнага агню мемарыяльнага комплексу «Курган Славы» ў парку «Фестывальны» і пачаў грэць ногі, аднак усё пайшло не па плане.
Мужчына так неасцярожна паводзіў сябе з агнём, што адзенне на ім загарэлася. І хоць змог патушыць полымя самастойна, усё ж такі яму спатрэбілася дапамога медыкаў.
Відавочцы выклікалі хуткую, а пасля 36-гадовага гомельца шпіталізавалі. Асноўнай прычынай здарэння называюць неасцярожнае абыходжанне з агнём.