U Łondanie zatrymali «zamožnaha rasijskaha bizneśmiena» pa padazreńni ŭ admyvańni hrošaj. Chto heta moža być?
Nacyjanalnaje ahienctva pa baraćbie sa złačynnaściu (NCA) Vialikabrytanii paviedamiła ab zatrymańni nienazvanaha «zamožnaha rasijskaha bizneśmiena» pa padazreńni ŭ admyvańni hrošaj, zmovie z metaj padmanu Ministerstva ŭnutranych spraŭ Vialikabrytanii i zmovie z metaj dačy chłuślivych pakazańniaŭ. Na hety momant jon užo vyzvaleny pad zakład.
04.12.2022 / 08:55
58-hadovaha rasijanina zatrymali 1 śniežnia ŭ jahonym domie ŭ Łondanie. U apieracyi ŭdzielničała bolš za 50 supracoŭnikaŭ NCA. Pry pieratrusie ŭ domie znajšli značnuju sumu hatoŭkaj.
«Hetaja apieracyja źjaŭlajecca apošniaj u sieryi dziejańniaŭ NCA, nakiravanych na spynieńnie dziejnaści karumpavanych mižnarodnych bizneśmienaŭ i ich pamahatych», — zajaviŭ kiraŭnik NCA Hrem Bihar.
Taksama byli zatrymanyja dva mierkavanyja saŭdzielniki bizneśmiena. Adzin ź ich — jaho 35-hadovy supracoŭnik, jaki vynosiŭ z doma sumku z tysiačami funtaŭ najaŭnymi. Inšy — 39-hadovy były bojfrend ciapierašniaj partniorki rasijanina, jakoha padazrajuć u admyvańni hrošaj i zmovie z metaj machlarstva. Jany, jak i sam pradprymalnik, vyzvalenyja pad zakład.
Adrazu paśla zatrymańnia SMI adznačyli, što ŭzrost zatrymanaha bizneśmiena supadaje z uzrostam suzasnavalnika «Alfa-Hrup» i chołdynha LetterOne Michaiła Frydmana, jaki žyvie ŭ Łondanie. Paśla pra toje, što ŭ Łondanie byŭ zatrymany mienavita Frydman, napisała ahienctva TASS sa spasyłkaj na krynicu ŭ asiaroddzi bizneśmiena.
Michaił Frydman
U Alfa-banku na prośbu prakamientavać toje, što zdaryłasia, adkazali tak: «Nam nieviadoma, pra kaho idzie havorka ŭ hetaj navinie, spadar Frydman znachodzicca ŭ siabie doma, nie pad aryštam. Nijakaha dačynieńnia da hetaj historyi jon nie maje». Sam Frydman zajaviŭ Forbes, što ŭ jaho «ŭsio ŭ paradku» i što ŭ vychadnyja jon sustrakajecca z siabrami.
Paśla rasijskaha ŭvarvańnia va Ukrainu Frydman patrapiŭ pad sankcyi JeS i Vialikabrytanii i skardziŭsia na źviazanyja z hetym finansavyja abmiežavańni.