Pa centry Cviary jeździli tanki z ukrainskimi ściahami, miascovaje načalstva pierapałochałasia
26 listapada ŭ Cviary zdymali prapahandyscki film «Muzykant». Pra hetyja zdymki na nabiarežnaj Ściapana Razina haradžan zahadzia papiaredžvali. Padčas hetych zdymak, pavodle siužeta, musili jeździć tanki z ukrainskimi ściahami, i jany jeździli — heta pacviardžajuć fota. Ale praciah historyi byŭ niečakany.
29.11.2022 / 19:51
Film «Muzykant» zdymajecca pry padtrymcy Minabarony i Minkultury Rasii, to-bok jaŭna jahony źmiest nie supiarečyć ideałahičnym normam sučasnaj rasijskaj dziaržavy. Tym nie mienš, dla miascovych čynoŭnikaŭ bačyć na vulicach rasijskaha horada navat u kino vajskovuju techniku pad varožymi ściahami akazałasia nadta vialikim psichałahičnym vyprabavańniem.
U vyniku zdymki zabaranili. U aficyjnym paviedamleńni havorycca:
«Administracyjaj Cviary pryniata pastanova ab admienie zdymak u horadzie mastackaha filma z vykarystańniem vajskovaj techniki z zamiežnaj simvolikaj i ściahami. Praca kiniematahrafistaŭ u minułyja vychadnyja na centralnych vulicach stalicy rehijona vyklikała niehatyŭnuju reakcyju žycharoŭ i šyroki hramadski rezanans».
Arhumientacyja hubiernatara Cviarskoj vobłaści Ihara Rudzieni była aryhinalnaja:
«16 śniežnia my budziem adznačać čarhovuju hadavinu vyzvaleńnia Kalinina ad niamiecka-fašysckich zachopnikaŭ. Naš horad staŭ pieršym abłasnym centram krainy, jaki Savieckaja Armija vyzvaliła padčas Vialikaj Ajčynnaj vajny. I raptam nazirajem, što na vulicach zdymajuć takija sceny. U sučasnaj situacyi heta niedapuščalna. Biezumoŭna, jość terytoryi, dzie možna heta zdymać, i histaryčna heta budzie pravilna. U nas ža nie pavinna być zdymak z vajskovaj technikaj i ściahami praciŭnika».