Zatrymali hienieralnaha dyrektara kampanii Belwooddoors
Źviazanyja ź siłavikami kanały paviedamlajuć pra zatrymańnie hienieralnaha dyrektara kampanii Belwooddoors Vitala Vasileviča. Pryčynaj zatrymańnia nazyvajuć toje, što jon nibyta nie puściŭ supracoŭnikaŭ milicyi na pradpryjemstva.
29.11.2022 / 17:27
Vital Vasilevič. Fota: sacsietki
Vitalu Vasileviču 49 hadoŭ, jon zasnavalnik i hienieralny dyrektar kampanii «Biellesvyrab» (Belwooddoors). U 1996 hodzie jon skončyŭ Minski miedycynski instytut, ale vybraŭ inšy šlach.
Jon zasnavaŭ kampaniju jak sapraŭdny startap — u 1999 hodzie pačaŭ vyrablać dźviery na nievialikaj arandavanaj płoščy, vyrablałasia tady kala 10 štuk na miesiac. Na siońnia kampanija vyrabiła bolš za 2,5 miljona dźviarej i źjaŭlajecca adnoj z samych vialikich vytvorčych kampanij u Biełarusi, maje pradstaŭnictvy ŭ Azii i ZŠA, a ŭ kampanii pracuje bolš za 400 čałaviek.
Taksama Vasilevič budavaŭ u Minsku 16-paviarchovy biznes-centr «Tytuł», jaki znachodzicca kala vakzała, na vulicy Tałstoha.
Da niadaŭnaha času jon byŭ u favory — nazva jahonaj kampanii była na stendzie honaru Zavodskaha rajona h. Minska, a kampanija ŭdzielničała ŭ proćmie aficyjnych konkursaŭ dy imprez.
Vital Vasilevič. Fota: sacsietki
Historyja, jakuju raspaviadajuć siłaviki, vielmi ćmianaja. Na vytvorčaść pryjechała milicyja, ale hiendyrektar nibyta admoviŭsia ich upuskać biez supravadžeńnia pracaŭnika firmy. Za heta jaho zatrymali pa administracyjnaj spravie.
U jaho telefonie znajšli fota z udziełam jaho z žonkaj u pratestach 16 i 23 žniŭnia 2020 hoda i niezarehistravanuju zbroju (na fota jana nie vyhladaje jak ahniastrelnaja). Za heta na jaho pahražajuć zavieści kryminalnuju spravu.